Elimizdegi eń iri IT kompanıanyń biri Bugin Holding tek mektep oqýshylaryna ǵana emes, balabaqsha búldirshinderi úshin de jańa jobany bastady.

Bul týraly kompanıa basshysy Aıbek Qýatbaı feısbýk paraqshasynda jazdy.

"Ordagen-ge deıingi taǵy bir etapty qosý strategıalyq josparymyzda bar edi. "Sabaqty ıne sátimen" demekshi, oıǵa alǵan josparymyz oryndalyp kele jatyr.

Bul - balabaqsha. Elimizdiń bolashaǵy jastar dep jatamyz. Olar búginde - búldirshin. Olarǵa beriletin tárbıeniń, bilimniń, qundylyqtardyń sapasy keleshekte eń mańyzdy rólderdi atqarady", - deıdi ol.

Aıbek Qýatbaıdyń jazýynsha, Bugin Holding kompanıasy BabyBoom Education balabaqshalar jelisiniń 43% úleskeri atanǵan.

Eske salsaq, buǵan deıin kompanıa mektep jasyna deıingi balalarǵa arnalǵan ónimderdi jaqsartý úshin "MaMa" jobasynyń da úlesin alǵan.

Sonymen qatar Bugin Holding dırektory aldaǵy josparlaryn da bólisti.

"Endigi jasalatyn jumystar eki birdeı jobanyń birige alǵa basýyna múmkindik syılaıdy:

- mektepke deıingi uıymdardy basqarýdyń keshendi LMS júıesi jasalady;

- Ordagen-niń kitaptary men oıyndary oqý úderisine enedi.

Bugin Holding jáne BabyBoom Education arasyndaǵy yntymaqtastyqtyń basty maqsaty: zamanaýı ata-analardyń qajettilikterine jaýap beretin jańartylǵan, biregeı ónimdi jasaý.

BabyBoom Education jaqyn arada rebrendıngke ıe bolmaq. Kompanıa ataýy Ordagen Kids bolyp ózgermek. Bul balabaqshalar jelisine zamanaýı IT-tehnologıalar arqyly oqytýǵa kóbirek kóńil bólýge, etnıkalyq ózindik sanany qalyptastyrýǵa, sondaı-aq qazaq tildi ortaǵa enýge múmkindik beredi", - deıdi holdıń basshysy.

Eske salaıyq, qazaq jastary qurǵan kompanıa ótken jyly 2,4 mıllıon dollar ınvestısıa ákelgeni týraly jazǵan edik.