20 shildede Túrkistan oblysy Saryaǵash aýdany Jibek joly aýylynda kisi qolynan ólgen bes jasar sábıdiń jetisine jınalǵan jurt narazylyqqa shyǵyp, tergeýdi ádil ótkizýdi talap etken, dep habarlaıdy Azattyq.
Bir top áıel "Pedofılderge ólim!", "Ádil sot bolsyn!" degen jazýy bar plakat ustap, Jibek joly aýylynyń ishimen ótip, qazaq-ózbek shekara beketine aparatyn kúre joldy japqan. Oqıǵa ornyna polısıa men arnaıy jasaq kelgen.
Jınalǵandardyń aıtýynsha, qyzdyń ólimine baılanysty tergeýge taǵy bir kúdikti shaqyrylǵan, keıin ony bosatqan. Turǵyndar "sot-medısınalyq saraptama qorytyndysy shyqpaı, kúdiktini shyǵarýǵa bolmaıdy" dep talap qoıǵan.
Joldy japqan narazy jurtty arnaıy jasaq ákimdik ǵımaratyna kúshpen kirgizgen. Ákimdik ókilderi men polısıa áıelderdiń shaǵymyn tyńdap, suraqtaryna jaýap beremiz degen. Kisi qolynan qaza bolǵan bala týysynyń sózinshe, qazir ákimdik ǵımaratyn arnaıy jasaq qorshap tur.
Pikir qaldyrý