Qyrǵyzstan prezıdenti Sadyr Japarov jýrnalıserge bergen suhbatynda jıeniniń jemqorlyqpen tutqyndalýyna qatysty pikir bildirdi. Bul týraly 24.kg agenttigi jazdy. 

Ol sybaılas jemqorlyqpen kúreste dos ta, dushpan da joq ekenin aıtty. Prezıdenttiń aıtýynsha, zańdy buzǵany úshin sottalǵandardyń barlyǵy memlekettiń birinshi tulǵalarymen týystyq dárejesine qaramastan jaýapkershilikke tartylady.

"Qazir zaman basqa. Barlyǵyna zań birdeı. Jemqorlyqpen aınalyssań qamaýǵa alynasyń. Memleketke eki eselengen shyǵyndy óteısiń de, ketesiń. Áıtpese túrmege jabylasyń. Men aralasyp, bul aǵany qamamańyz desem, qalǵandary da zań buza bastaıdy. Qyrǵyzdarda bir jaza myń adamǵa sabaq bolady degen jaqsy sóz bar”, – dedi Sadyr Japarov. 

Eske sala keteıik, buǵan deıin Bishkekte eldiń qazirgi prezıdenti Sadyr Japarovtyń jıeni Ulan Japarov jemqorlyqpen ustalǵan bolatyn.