Qyrǵyzstannyń memlekettik til týraly zańyn Reseı SİM "demokratıaǵa saı emes" dep baǵalady. Bul týraly Reseı SİM saıtyna siltime jasap, Azattyq radıosy habarlady.

"Qazir TMD keńistiginde kúrdeli jaǵdaılar bolyp jatyr. Birneshe aı buryn Qyrǵyzstanda zań qabyldandy. Bul ıdeıa paıda bolǵan sátte-aq biz qyrǵyz dostarymyzǵa "qyrǵyz tilin jappaı mindetteý - demokratıaǵa saı emestigin" eskertkenbiz. Memlekettik qyzmet sanatyna muǵalimder men memlekettik medısınalyq mekemelerde jumys isteıtin dárigerler de kirgen. Jumysty jalǵastyramyz. Qyrǵyz konstıtýsıasynda orys tili ult aralyq qatynas tili ekeni birneshe ret eskertilse de basqa jaqqa tartyp otyr" dedi Reseı syrtqy ister mınıstri Sergeı Lavrov.

Eske sala keteıik, 17 shildede Qyrǵyzstan prezıdenti Sadyr Japarov til týraly zańǵa qol qoıǵan. Zańǵa sáıkes endi memlekettik qyzmetkerler, depýtattar, ulttyq bank qyzmetkerleri, kúsh qurylymdary, sot, prokýratýra, advokattar, notarıýstar, oqý oryndarynyń qyzmetkerleri, medısına qyzmetkerleri memlekettik til – qyrǵyz tilin bilýge jáne qyzmet mindetin oryndaý kezinde paıdalanýǵa tıis.

Bul zań menshik túrine qaramastan teleradıokompanıalardy baǵdarlamanyń kemi 60 paıyzyn qyrǵyz tilinde júrgizýge mindetteıdi. Birlesken kompanıalar men sheteldik kompanıalar ataýy qyrǵyz tilindegi translıterasıamen jazylýǵa tıis.

Zańda orys tili Qyrǵyzstanda resmı til retinde qoldanylatyny kórsetilgen.