Qazir Fransıady júrgen Muhtar Áblázovtyń sybaılasy ári naǵashy aǵasy Qýanysh Nurǵazın óz erkimen elge oraldy. Aıtýynsha, jıeni úshin 12 jyl boıy shetelde jasyrynýǵa májbúr bolǵan, dep habarlaıdy Almaty.tv.
2007 jyly Muhtar Áblázov Qýanysh Nurǵazındy BSC kompanıasynyń nomınaldy dırektory etip taǵaıyndaǵan. Bas prokýratýranyń málimetinshe, Áblázov pen onyń sybaılastary osy kompanıany zańsyz nesıelendirý arqyly BTA bankten asa iri kólemde qarajat jymqyrǵan.
Quzyrly organ ókilderi Nurǵazın sol kezde bul iske qatysy bola tura eshqaıda ketpeý týraly mindettemeni buzyp, qylmystyq jaýaptan jaltarý úshin sottan jasyrynǵanyn aıtady. Nurǵazın osylaısha 2012 jyly Qazaqstannan Lıtvaǵa ketip, ózge elde 12 jyl boıy bosqyn mártebesimen júrgen.
"2007-2009 jyldar aralyǵynda BSC kompanıasynyń dırektory boldym. BSC kompanıasy 152 mln teńge nesıe alǵan. Maǵan nesıe alǵanda sybaılas boldyń dep aıyp taǵylyp otyr", – dedi kúdikti 73 jastaǵy Qýanysh Nurǵazın.
Sot Qýanysh Nurǵazındi Muhtar Áblázovtyń sybaılasy dep tanyp, onyń ústinen bólek qylmystyq is qozǵaıdy. BSC kompanıasynyń dırektory qyzmetinde ǵana tirkelgen ol istiń osylaısha nasyrǵa ulasyp keterin bilmegenin aıtty.
"Men izdeýde júrgenimdi bilgen joqpyn. 2014 jyly aýrýhanadan shyǵyp kele jatqanymda polısıa ustady. Sol kezde túsindim. Maǵan "bosqyn" degen ataq berdi. Osy ýaqytqa deıin Lıtvada boldym, – dedi Nurǵazın.
Ózge elde júrip, onyń densaýlyǵy kúrt nasharlaǵan. Birneshe kúrdeli ota jasaǵan. Sozylmaly aýrýǵa shaldyqqan. Al sońǵy 5 jylda jıenimen baılanysy úzilgendikten, qarjylaı qoldaý da bolmaǵan kórinedi.
"Meniń 12 jyl ómirim jıenim úshin shetelde ótti. Ol jerde esepte turdym. Jylyna eki ret aýrýhanaǵa jattym. Densaýlyǵyma baılanysty kóp ózgeris boldy. Júrekten eki ret ınfarkt aldym. Býyndarymdy aýystyrdy, eki ıyǵym jyǵylǵannan úzilip ketip, tiktirdim. Shetelde ótken ómirim sol balaǵa baılanysty boldy", – dedi kúdikti Qýanysh Nurǵazın.
Arada osynsha ýaqyt ótkennen keıin Nurǵazın Otanyna óz erkimen kelýdi uıǵarypty. Ol Qazaqstanǵa kelý úshin Lıtvanyń saıası qamqorlyǵynan da bas tartqan.
Onyń elge qaıtýyna Qazaqstandaǵy demokratıalyq ózgerister sebep bolǵan. Endigi ómirin týǵan jerinde balalary men nemereleriniń qasynda ótkizýdi josparlap otyr.
"Eshqashan saıasatqa aralaspadym. Men oǵan "sen aralas, aralaspa" dep aıta almaımyn. Ol meni tyńdamaıdy. Meniń erkim ózimde. Jańa Qazaqstan dep jatyr ǵoı, demokratıalyq ózgerister bolady dep senemin. Sondyqtan elge, jurtqa qaıtýdy sheshtim. Men shetelde júrgen qashqyndarǵa sottyń ádil sheshimi bolatynyn aıtqym keledi. "Otan ottan da ystyq". Sondyqtan qaıtý kerek dep esepteımin", – dedi Qýanysh Nurǵazın.
Aıta keteri, Qýanysh Nurǵazın 2023 jyly 24 shildede ushaqpen Lıtvadan Stambýl arqyly Almaty halyqaralyq áýejaıyna kelip qonady. Áýejaıdan túse sala, ol ustalyp, ýaqytsha ustaý ızolátoryna qamalady. Qazir sot sheshimimen 2 aı merzimge úıqamaqqa aýystyryldy.
Tergeý amaldary jalǵasyp jatyr. Aldaǵy ýaqytta sot talqylaýy qaıta bastalady. Endi onyń qandaı jaza arqalaıtynyn sot aıqyndaıdy.
