Keshe órt shyqqan Aqkent shaǵyn aýdanyndaǵy turǵyn úıdegi tútinge qarsy qorǵanys júıesinen aqaý shyqqan. Bul týraly Almaty tótenshe jaǵdaılar departamenti habarlady. 

"Joǵary qabatty ǵımarattarda edendik tútin shyǵarý júıesi arnaıy qarastyrylǵan. Eger jumys istep tursa edenderde mundaı qatty tútin bolmas edi", – dedi Almaty TJD bastyǵynyń mindetin atqarýshy Erlan Álibekov.

Sondaı-aq áleýmettik jelide turǵyndardyń terezeden sekirgen vıdeosy qyzý talqylanǵan bolatyn. Erlan Álibekov buǵan qatysty pikir bildirdi. 

"Órt kezinde óte qıyn jaǵdaılar oryn aldy. Turǵyndar qatty baıbalam saldy. Olardy úreılenbeýge shaqyrǵan edik. Balkonǵa shyǵyp, esikterdi jaýyp, kómek kútýge de bolatyn edi. Biz keshe úılerdiń ishinde qatty tútinniń bolmaǵanyn kórdik. Múmkindik bolǵanda esikti jaýyp, qutqarýshylardy kútýge bolatyn edi", – dedi Erlan Álibekov.

Sondaı-aq turǵyndar órt sóndirýshiler kelmeı turyp terezeden sekirgen. Álibekovtiń aıtýynsha, mundaı kópqabatty úılerde órt shyqqan jaǵdaıda turǵyndar sabyr saqtap, tútin shyǵarmaıtyn baspaldaq alańdaryn paıdalanýǵa tyrysýy kerek.