2 tamyzda premer-mınıstrdiń orynbasary – saýda jáne ıntegrasıa mınıstri Serik Jumanǵarın men Aýǵanstannyń saýda jáne ónerkásip mınıstri Alhadj Nurıddın Azızı yntymaqtastyqtyń negizgi aspektilerin talqylady. 

Serik Jumanǵarın sáýir aıynda Kabýlǵa sapary kezinde taraptar elder arasyndaǵy taýar aınalymynyń kólemin $1 mlrd-tan $3 mlrd-qa deıin ulǵaıtý mindetin qoıǵanyn atap ótti.

"Qazaqstandyq kompanıalardyń Kabýlǵa sońǵy saparynyń qorytyndysy boıynsha bizdiń energetıkalyq sýsyndarymyz, un ónimderi, mıneraldy tyńaıtqyshtardyń alǵashqy jóneltilimi boldy, kúnbaǵys maıyna da qyzyǵýshylyq bar. Aýǵanstannan ımportta aýylsharýashylyq ónimderimen qatar toqyma buıymdary paıda boldy. Belsendilik tanytatyn jumys baǵytymyz bar", — dedi Serik Jumanǵarın.

Al Aýǵanstan mınıstri Qazaqstannyń gýmanıtarlyq kómegine qatysty óz pikirin aıtty.

"Biz Qazaqstan Prezıdentine, Qazaqstan Úkimetine alǵys aıtyp jatyrmyz. Qazaqstannyń gýmanıtarlyq saladaǵy qoldaýyn joǵary baǵalaımyz. Biz saýda salasyndaǵy baılanystarǵa, osyǵan deıingi aýǵan halqyna jasalǵan kómekke rızamyz", - dedi Nýrıddın Azızı.

Sondaı-aq yntymaqtastyqty jandandyrý úshin aýǵan tarapyna Gerat qalasyndaǵy Qazaqstannyń saýda úıiniń áleýetin paıdalaný jáne Qazaqstanda óziniń saýda ókildigin ashý usynyldy.

"Qazaqstan otandyq kompanıalardyń Aýǵanstanda, ásirese kólik, taý-ken, telekomýnıkasıa jáne aýyl sharýashylyǵy salalarynda iske asyrylatyn basqa da ekonomıkalyq jobalarǵa qatysýyn qarastyrýda. Atap aıtqanda, bıyl sáýir aıynda qazaqstandyq delegasıanyń Kabýlǵa saparynan keıin «Qazaqtelekom» AQ Aýǵanstanǵa komersıalyq negizde talshyqty-optıkalyq ınternetti jetkizýge aýǵan tarapymen kelisimshartqa qol qoıdy. Qazaqstan men Aýǵanstan bilim berý baǵytynda da yntymaqtasady. Búginde Ál-Farabı atyndaǵy QazUÝ Aýǵanstannyń 130 stýdenti bilim alýda. Serik Jumanǵarın qyzyǵýshylyq tanytqan jaǵdaıda Qazaqstanda Aýǵanstannan kelgen stýdentterdiń sanyn kóbeıtýdi usyndy”, – delingen úkimet habarlamasynda.