Shymkentte tanystary men týystaryn aldap, 340 mln teńge jymqyrǵan qylmystyq toptyń músheleri sottaldy. 

Polısıa qyzmetkerleriniń málimetinshe, qalalyq polısıa bólimshesine jalǵan tendermen aınalysatyn alaıaqtardyń qurbany bolǵanyn aıtyp, 235 adam shaǵym túsirgen.

Jábirlenýshilerdiń aıtýynsha, óz tanystary tendermen aınalysatyn bastyǵyna kómek qajettigin alǵa tartyp, nesıe rásimdeýge úgittegen. Jasaǵan jaqsylyǵy úshin tıesili úlesin berýge jáne bank aldyndaǵy qaryzdy tolyq óteýge ýáde etken. Kóbinese olar nesıeni taýarlaı rásimdetip, alynǵan qymbat tehnıkany qaıta satyp, shyqqan somanyń 10-12 paıyzyn syıaqy retinde berip otyrǵan. Alaıda aı saıynǵy tólem ýaqyty kelgende, kúdiktiler qońyraýǵa jaýap bermeı, izderin sýytqan. Saldarynan nesıe ósimi kóbeıip, azamattar qaryzǵa belshesinen batqan.

11 adamnan turatyn qylmystyq toptyń qurbandary Túrkistan oblysynyń jáne Shymkent qalasynyń turǵyndary bolyp shyqty. Atalǵan jaıtty tergeýshiler QR QK-niń 190 baby boıynsha is qozǵady. 

Qylmystyq top 23-43 jas aralyǵyndaǵy 4 áıel jáne 7 er adamnan turǵan. Onyń ishinde eki bank menedjeri bar. Olardyń árqaısysynyń óz mindetteri bolǵan: keıbiri nesıe alatyn adamdardy tabýmen, ekeýi ony rásimdeýmen, qalǵandary satyp alynǵan taýarlardy alyp-satýmen aınalysqan. Keltirilgen jalpy shyǵyn kólemi – 340 mln teńgege jýyq. Aryzdanýshylar ártúrli bankterden 250 myń teńgeden 6 mln teńgege deıin qaryz alǵan.

Tártip saqshylary jınaqtalǵan is-qujattardy aıyptaý aktisimen sotqa joldady. Aıyptalýshylardyń árqaısysy jasaǵan qylmysy úshin 5 jylǵa deıin sottaldy.