Astanada balalarymen birge kópqabatty úıdiń terezesinen sekirip ketpek bolǵan áıel qutqarylǵan.

İİM málimetinshe, 9-shy qabattaǵy páterdiń terezesinen áıeldiń eki balasymen birge sekireıin dep jatqanyn estigen avtopatrýl oqıǵa ornyna jetken.

"Birinshi bolyp №26 ýchaskelik polısıa pýnktiniń polısıa bólimshesiniń aǵa ınspektory Asqar Papyshev óziniń seriktesi Eldos Nuǵmanovpen birge jetti. Olar aýdan turǵyndarymen jıyn ótkizip jatqan bolatyn. 9-shy qabatqa kóterilgen polıseıler úlken balanyń ákesimen birge turǵanyn kórdi" – delingen polısıa habarlamasynda.

Al kishi balasyn áıel ózi ustap turyp, oǵan bireý jaqyndasa, sekiretinin aıtyp aıqaılaǵan. Tártip saqshylarynyń biri áıeldi sózge tartyp, mundaı qadamǵa barmaýyn ótinip jatqanda, ekinshi polıseı formasyn azamattyq kıimge aýystyryp úlgergen. Keıin ol páterge kirip, áıelge bildirtpesten bir qolymen balanyń qolynan, ekinshi qolymen anasyn myqtap ustap alyp, bólmege qaraı tartyp kirgizdi.

24 jastaǵy áıeldiń otbasylyq janjaldan keıin osyndaı áreketke bel býǵany belgili boldy. Onyń kúıeýine qatysty Ákimshilik quqyq buzýshylyq týraly kodekstiń 73-babynyń 1-bóligi "Otbasylyq-turmystyq qatynastar salasyndaǵy quqyqqa qaıshy áreketter" boıynsha ákimshilik hattama toltyryldy.Otbasy erekshe baqylaýǵa alyndy. Áıel balalarymen birge Astana qalasynyń daǵdarys ortalyǵyna ornalastyryldy. Onymen profılaktıkalyq áńgime júrgizilip, psıhologıalyq kómek kórsetildi.