Almaty qalalyq polısıa departamenti "Maýglı balalardyń anasy" ata-ana quqyǵynan aıyrylatynyn aıtty, - dep habarlaıdy Polisia.kz.

Dabyl qaqqan Medeý aýdandyq PB ıývenaldy polısıa bóliminiń ınspektory birneshe kún boıy polısıada esepte turǵan 41 jastaǵy H. esimdi azamatshanyń otbasyn tekserýge árekettengen.

"Bul otbasyn bıylǵy mamyrda tirkedik, balalardyń anasy Pavlodardan kelgen. Tekserý kezinde áıel baılanysqa shyǵýǵa qulyqsyz boldy. Kezekti tekserý barysynda, 8 tamyzda birdeńeniń durys emes ekenin sezdim: úıde dybystar estildi, biraq esikti eshkim ashpady. Meniń dabylym boıynsha oqıǵa ornyna jergilikti ýchaskelik ınspektor, TJD qyzmetkerleri men qamqorshylyq ókilderi tartyldy. Esik kúshpen ashyldy. Saraptamamen rastalǵandaı, áıel úıde "ortasha dárejedegi" alkogóldik masań kúıde bolǵan. 2016 jyly týǵan qyz balaǵa, 2018 jyly týǵan ul balaǵa jáne 2020 jyly týǵan taǵy bir ul balaǵa kútim jasalmaǵan. Úıdiń ishi las boldy. Balalar birden ómirlik qıyn jaǵdaıǵa tap bolǵan balalarǵa qoldaý kórsetý ortalyǵyna jetkizildi", – deıdi Medeý aýdandyq PB IýPB kámeletke tolmaǵandar isteri jónindegi ýchaskelik ınspektory Aıjan Býtabaeva.

Medeý aýdandyq polısıa basqarmasy basshylyǵynyń aıtýynsha, is materıaldary jınaqtalyp, áıeldi odan ári ata-analyq quqyǵynan aıyrý úshin 2023 jyldyń 18 tamyzynda kámeletke tolmaǵandardyń quqyqtaryn qorǵaý komısıasyna joldanatyn bolady.