Shymkenttegi gúl dúkenindegi bolǵan jaǵdaıǵa qatysy bar memlekettik qyzmetker jumystan shyǵaryldy. Bul týraly Otyrar.kz portaly jazdy.

Eske sala keteıik, áleýmettik jelide Shymkenttegi gúl dúkenderiniń birinde dúken jumysshylaryna belgisiz bireýderdiń kúsh kórsetken vıdeosy taraǵan bolatyn. İshki ister mınıstrligi olardyń arasynda polıseıdiń de bolǵanyn rastaǵan. Keıin olardyń arasynda Eńbekshi aýdany boıynsha memlekettik kirister basqarmasynyń basshysy Danıar Elqondy bolǵany anyqtaldy.

"Memlekettik qyzmet isteri agenttigi qyzmettik tergeý júrgizip, tártiptik jazaǵa tartýdy zerdeleý úshin sharalar qabyldaýdy tapsyrdy. Búginde Danıar Maratuly Elqondynyń ózi ótinish jazdy. Sonyń negizinde ol qyzmetinen bosatyldy. Zańǵa sáıkes, onyń memlekettik qyzmetten óz erkimen ketýine eshqandaı kedergi bolmaǵan" - dep jazylǵan habarlamada.