17 tamyzda ótken sot otyrysynda Jambyl oblystyq apelásıalyq soty Tarazda Qandy Qańtarda «UQK podpolkovnıgi Dastan Ádilbaıdy óltirdi», «qarý-jaraq urlady jáne saqtady» dep aıyptalyp, 16 jylǵa sottalǵan Erbol Jumanovtyń apelásıalyq shaǵymy boıynsha qaýly oqydy. Sot alqasynyń tóraǵasy Nurmuhammat Abıdov birinshi satyly sottyń úkimin ózgerissiz qaldyrdy. 

Erbol Jumanov pen onyń qorǵaý tarapy sot qaýlysyna narazylyq bildirip, aldaǵy ýaqytta Joǵary sotqa kasasıalyq shaǵym túsiretinderin málimdedi. Qaýly oqylǵanda aıdaýyl Erbol Jumanovty qorǵaýshylarynan alshaq, zaldyń esikke jaqyn bóliginde ornalasqan torǵa otyrǵyzdy. Buǵan deıingi sot prosesteriniń barlyǵynda ol jýrnalıserge jaqyn jerde otyrǵyzylyp kelgen. Aıdaýyl sot qaýlysy oqylyp bitken tusta, ony sońyna deıin sóıletpeı, zaldan alyp ketti.

Sot alqasy Nurahan Mahatov, Aıbol Saǵyntaı, Jaqsylyq Abdýllaevtyń birinshi satyly sot shyǵarǵan úkimderin buzyp, árqaısysyn 4 jylǵa bas bostandyǵynan aıyrdy (birinshi satydaǵy sot 5 jylǵa sottaǵan). Proses aıaqtalǵannan keıin advokattar zaldan shyǵyp bara jatyp, sottalýshylardyń týystaryna basý aıtyp, úsh aıdan keıin merziminen buryn bosap shyǵýǵa múmkindikteri bar ekenin aıtyp jatty.

Túske deıingi sot otyrysynda Erbol Jumanovtyń qorǵaý tarapy sot alqasyna senimsizdik bildirgen. Erbol Jumanovtyń qoǵamdyq qorǵaýshysy Erjan Jumanov osy ýaqytqa deıin 16 ótinishhat túsirgenderin, onyń 12-i qanaǵattandyrylmaǵanyn aıtty. Biraq ony ózge sottalýshylar men olardyń qorǵaýshylary qoldamady. Sot alqasy osyny alǵa tartyp, ótinishhatty qanaǵattandyrmady. Prosesti basynan aıaǵyna deıin zaldyń artqy bóliginde arnaıy jasaq baqylap otyrdy. Ǵımarat syrtynda jedel járdem, órt sóndirý qyzmetiniń kólikteri turdy.

Prokýror Saıahat Baǵdatuly qorytyndy sózinde Erbol Jumanovtyń raqymshylyq zańyn paıdalanyp, jazasyn óteý merzimin qatań rejımnen qaýipsizdigi ortasha mekemege aýystyrýdy surady. Ol buǵan deıingi aıyptaý aktisinde Jumanovtyń 16 jyl jazasyn ózgerissiz qaldyrýdy suraǵan. Qandy Qańtar kezinde birinshi satyly sot Erbol Jumanovty QR QK 291-babynyń 3-bóligi 4-tarmaǵy, 24-babynyń 3-bóligi, 287-babynyń 4-bóligi, 380-1-babynyń 2-bóligi 2,10-tarmaqtarymen kináli dep tanylyp, 16 jylǵa bas bostandyǵynan aıyrǵan.

Erbol Jumanovtan bólek, bul is boıynsha taǵy 8 adamǵa úkim shyqqan. 28 sáýirde sýdıa Qadirbek Nurjan Nurahan Mahatov 6 jylǵa, Aıbol Saǵyntaı men Jaqsylyq Abdýllaevty 5 jylǵa bas bostandyǵynan aıyrý jazasyna kesip, Qanat Nurahanuly, Ermahan Saılaýov, Dáýren Nurálıev, Dosmuhammet Sadyqov jáne Salamat Qosanovty raqymshylyq zańyn paıdalanyp, sot zalynan bosatqan. 

Derekkóz: The Qazaq Times