Túrkistan oblysynyń ákimdigi Syrdarıa ózenine batyp ketken adamdardyń otbasylaryna barlyq qajetti kómek kórsetiletinin habarlady. Sondaı-aq qaıǵyly oqıǵanyn mán-jaıyn túsindirdi.
Qaıǵyly jaǵdaı 21 tamyzda keshki saǵat 18:00-diń kezinde Otyrar aýdanyndaǵy Syrdarıa ózeninen ótetin kópir mańynda bolǵan. Shomylýǵa barǵan 20 adamnyń 11-i sýǵa batyp ketken. Onyń 5-eýi balalar bolsa, 6-aýy – eresekter. Barlyǵy Syrdarıa ózenindegi avtokólik kópiriniń mańynda tyıym salynǵan jerde shomylǵan.
Sońǵy aqparatqa sáıkes, sýǵa ketken 11 adamnyń segiziniń denesi tabyldy. İzdestirilip jatqan úsh adamnyń ekeýi – jasóspirimder. Sýǵa batyp ketkenderdiń barlyǵy – Kóksaraı aýylynda turatyn bir áýlettiń adamdary.
Jergilikti turǵyndardyń aıtýynsha, qaıǵyly jaǵdaı bolǵan jerde sýdyń aǵysy qatty. Al jaǵada saz ben balshyq kóp. Qaıtys bolǵan adamdar sýǵa túsip te úlgermegen. Bireýi taıyp sýǵa qulaǵan, ony basqalar qutqaramyn degende birinen soń biri batyp ketken.
"Qutqarýshylar men eriktiler turǵyndarǵa jaz boıy bul jerge túsýge bolmaıtyny týraly jan-jaqty eskertý jumystaryn júrgizgen. Anyqtalǵandaı, mundaı túsindirý jumystaryna dál osy áýlet te qatysqan. Alaıda ruqsat etilmegen orynda shomylýdyń zardaby men saqtyq sharalaryn eskermeýdiń saldary osyndaı jaǵdaıǵa ulasyp otyr", - deıdi ákimdik mamandary.
Qazirgi kezde oqıǵa ornynda júzdegen qutqarýshy júr. Ákimdiktiń janynan arnaıy shtab quryldy. Jedel jeliniń telefony: 8-7253-357881.
Pikir qaldyrý