23 tamyz kúni ishki ister mınıstrligi ulttyq qaýipsizdik komıtetimen birlesip, prokýratýranyń úılestirýimen Qaraǵandy oblysyndaǵy krımınogendik jaǵdaıǵa teris áser etetin qylmystyq topty ustaý boıynsha keń aýqymdy arnaıy operasıa júrgizdi, dep habarlaıdy Polisia.kz.
Arnaıy operasıa Astana jáne Qaraǵandy qalalarynyń aýmaǵynda ótti.
Polısıanyń málimetinshe, top músheleriniń taý-ken óndirýshi kompanıalardyń biriniń taýarlyq-materıaldyq qundylyqtaryn urlaýǵa, esirtki men atys qarýyn saqtaýǵa, sondaı-aq 2022 jyly qylmystyq teketires kezinde Qaraǵandy turǵynyn óltirýge oqtalý faktisine qatysy bar ekeni anyqtaldy.
Osy qastandyqty jasamaq bolǵan toptyń yqtımal "kılleri" kórshi memlekettiń aýmaǵynda ustaldy.
Quqyq qorǵaý organdary 70 tintý is-sharasyn ótkizdi. Sonyń nátıjesinde toǵyz qarý, 400-ge jýyq oq-dári, pyshaqtar, radıostansıalar, úlken kólemde aqsha jáne basqa da zattaı dáleldemeler tabylyp, tárkilendi.
"Polısıaǵa 28 adam jetkizildi, onyń ishinde toptyń 12 belsendi múshesi ýaqytsha ustaý ızolátoryna qamaldy", - dep habarlady ishki ister mınıstrligi uıymdasqan qylmysqa qarsy kúres departamentiniń basqarma bastyǵy Qýandyq Alpys.
Qylmystyq kodekstiń birneshe baby boıynsha sotqa deıingi tergep-tekserý júrgizilýde, tıisti saraptamalar taǵaıyndaldy.
Pikir qaldyrý