"Qazaqstan demokratıalyq tańdaýy" qozǵalysyn qurýshylardyń biri, saıasatker Ǵalymjan Jaqıanov áleýmettik jelidegi paraqshasynda ózine qatysty qylmystyq istiń qaıta qozǵalǵanyna baılanysty pikir bildirdi. 

"Bul isterdiń bári men Qusmuryn kolonıasynda otyrǵan kezde ashylǵan. Sonda Nazarbaevtyń tapsyrmasymen kolonıaǵa kelgen shabarmandar, Ulttyq qaýipsizdik komıtetiniń basshylary óz maqsattaryn jasyrmady. Olar meni saıasattan jáne Qazaqstandaǵy demokratıa úshin kúresten bas tartýǵa, jazbasha jáne vıdeo arqyly prezıdentten keshirim suraýǵa májbúrlegisi keldi. Talaptaryn oryndamaǵan jaǵdaıda ústimnen jańa qylmystyq ister ashyp, túrmege máńgilikke qamaımyz dep qysym jasady. Maǵan qarsy kóptegen dálel bar dep qorqytpaqshy bop, ákelgen jáshikterine qaraı siltegenderi esimde"- dep jazdy saıasatker. 

Ǵalymjan Jaqıanov bul bopsalarǵa kónbeı, el basshylyǵy budan eshteńe shyqpaıtynyna kózi jetken soń, bılik ony túrmeden shyǵarýǵa májbúr bolǵanyn málimdedi. Saıasatker 2006 jyly shartty túrde merziminen buryn bosatylǵanyn osylaı túsindirdi.

"Sodan beri qozǵalǵan qylmystyq isterdiń materıaldary saıası qýdalaý "kontorasynda" jatty. Shamasy "X saǵaty" jetkende meni noqtalaý úshin bılik sol isterdiń qajeti bolar dep saqtaǵan sıaqty. Maǵan qarsy qozǵalǵan ister umytylyp ketkendeı boldy. Biraq men umytqan joqpyn. 20 jyl boıy ózim jáne meniń advokattarym tıisti memlekettik organdarǵa aryz-talaptar jazyp keldik. Ár joly UQK men quqyq qorǵaý organdarynan túrli syltaýmen mánsiz jaýaptar kelip turdy. Endi "qylmys quramy joq" degen tujyrymmen barlyq ister resmı túrde jabyldy"- dedi ol. 

Alaıda Jaqıanov qylmystyq isterdiń jabylýymen ádilet ornady dep eseptemeıtinin jazdy. 

"Zańsyz áreketke qatysy bolǵan laýazymdy tulǵalardy jaýapqa tartý jaıynda zańgerlermen keńesip otyrmyn. Men ony kek alý maqsatymen jasap otyrǵan joqpyn. Shyn mánisinde maǵan jáne basqa da saıası qýǵynǵa ushyraǵan adamdarǵa qarsy ashylǵan osyndaı jalǵan ister bıliktiń eń basynda uıymdasqan qylmystyq top qalyptasqanyn kórsetedi. Budan bylaı qylmystyq isti oıdan shyǵaratyndar, ásirese mundaıdy jasaýǵa buıryq beretinder erte me, kesh pe jaýapqa tartylatynyn bilýi kerek. Qazaqstanda eshkim bılikten basqasha oılaǵany úshin jáne beıbit saıası kúresi úshin qýdalanbaýy kerek"- dep málimdedi saıasatker.