Memleket basshysynyń tapsyrmasy boıynsha «100 zamanaýı oqúshylar saraıyn salý» baǵdarlamasyn júzege asyrý aıasynda Almaty ákimi Erbolat Dosaev aldaǵy oqý jyly qarsańynda Alataý aýdanynda jańa Inovasıalyq shyǵarmashylyq ortalyǵyn ashty.

Eske salsaq, Naýryzbaı aýdanyndaǵy mektep jasyndaǵy balalarǵa arnalǵan alǵashqy ınovasıalyq shyǵarmashylyq ortalyqty Prezıdent Qasym-Jomart Toqaev osy jyldyń maýsym aıynda Almatyǵa jumys sapary barysynda ashqan bolatyn.

Ortalyqty aralaý barysynda Erbolat Dosaev Alataý aýdanyn áleýmettik-demografıalyq turǵydan eń qarqyndy damyp kele jatqan aýdandardyń qataryna jatatynyn, jańa ortalyqtyń ashylýy mańyzdy ári zamanaýı ekenin atap ótti. Megapolıstegi 302 myń oqýshynyń 55 myńnan astamy Alataý aýdanyna tıesili. Bıylǵy jyly birinshi synypqa 6200 bala qabyldandy-bul qala boıynsha eń joǵary kórsetkish. Ótinishterdi qabyldaý 1 qyrkúıekte bastalady, al qyrkúıektiń ortasynan bastap balalar 33 túrli úıirmege qatysa alady. Ortalyq aptasyna 5 myńǵa deıin balany qabyldaıdy.

«Basty mindet – balalarymyzǵa jaqsynyń bárin berý. Jańa ortalyq aýdan mektepteri men balabaqshalarǵa qadamdyq qoljetimdilikte arnaıy ashyldy jáne eń joǵary standarttar boıynsha bilim berý tehnologıalarymen jabdyqtalǵan. Osy ortalyqtyń ashylýy barysynda Alataý aýdanynda oqýshylar men olardyń ata-analaryna yńǵaıly bilim berý klasteri quryldy. Ázirlengen baǵdarlamalary bar seksıalar balalarǵa mektepte alǵan bilimderin tereńdetýge jáne keńeıtýge múmkindik beredi», - dedi Erbolat Dosaev ortalyq oqytýshylaryna   arnaǵan sózinde jáne  olarǵa tabys tiledi.

Ákim tigin sheberhanasyna, aspazdyq stýdıasyna, sport zaldaryna, akterlik sheberhana stýdıasyna, mýzykalyq stýdıa men dybys jazý stýdıasyna, qysqy baqta ornalasqan art-stýdıaǵa bardy. Ortalyqta kovorkıng aımaǵy, balalardyń kóńilin kóterýge arnalǵan ınteraktıvti proeksıalyq zal jáne oqýshylarǵa arnalǵan demalys aımaǵy, ashyq terasa bar.

Ortalyqtyń ereksheligi-klassıkalyq baǵyttardan basqa, zamanaýı baǵyttar da qarastyrylǵan, olar: modeldeý, VR synyptary, avıamodeldeý, ónerkásiptik dızaın. Bul rette ortalyqtaǵy sabaqtar kásiptik baǵdar berý fýnksıasyn oryndaıdy: stýdıalardyń kolejdermen jáne joǵary oqý oryndarymen baılanysy bar. Mysaly, aspazdyq stýdıasy – servıstik qyzmet kórsetý kolejiniń aspazdyqensıı boıynsha quzyrettilik ortalyǵymen, al Fızıka jáne hımıa zerthanalary-Almatynyń joǵary oqý oryndarymen.

Osy baǵytta Erbolat Dosaev WorldSkills formatyndaǵy kóptegen chempıonattarǵa qatysatyn tájirıbeli tálimgerler men beıindi joǵary oqý oryndary men kolej stýdentteri usynǵan bilim alýshy balalar men oqytýshylar quramy arasyndaǵy shyǵarmashylyq yntymaqtastyqty damytý qajettigin atap ótti.

Ortalyqta erekshe qajettilikteri bar balalardy sabaqqa tartý úshin múmkindikter jasalǵan. Mysaly, usaq motorıkany damytýǵa baǵyttalǵan seksıalar qarastyrylǵan. Sonymen qatar, ákim Erbolat Dosaev vırtýaldy shyndyq kabınetiniń baǵdarlamalaryn ınklúzıvti oqytý úshin beıimdeý múmkindigin qarastyrýdy tapsyrdy.

 Sonymen qatar logopedter, defektologtar, psıhologtar jumys isteıtin EDSH-zaldar men korreksıalyq kabınetter qarastyrylǵan. Tutastaı alǵanda, ortalyqtyń búkil aýmaǵynda, terasany qosa alǵanda, múmkindigi shekteýli toptardyń qozǵalýyna jaǵdaı jasalǵan.

Oqytýshylar quramymen qorytyndy áńgimesin túıindegen Erbolat Dosaev ákimdiktiń polıortalyq qaǵıdaty boıynsha taǵy bes ınovasıalyq shyǵarmashylyq ortalyqty modernızasıalaý jáne salý jónindegi nıetin rastady.