Ǵabıt Ábdimajıtuly Syzdyqbekov Shymkent qalasynyń ákimi laýazymyna taǵaıyndaldy, dep habarlaıdy Aqorda. Ol 2021 jyldyń shilde aıynan bastap premer-mınıstr keńsesi basshysynyń birinshi orynbasary bolyp qyzmet atqardy.

Ǵabıt Syzdyqbekov 1980 jyly Shymkent qalasynda dúnıege kelgen. Qazaq memlekettik zań ýnıversıtetin, RF SİM Dıplomatıalyq akademıasyn bitirgen. Eńbek jolyn 2004 jyly QR SİM Memlekettik protokol qyzmetiniń attashesi qyzmetinen bastaǵan.

• 2005-2006 jyldary – QR SİM Memlekettik protokol qyzmetiniń úshinshi hatshysy; QR SİM Eýropa jáne Amerıka departamentiniń úshinshi hatshysy.
• 2006-2007 jyldary – QR SİM Keńsesi baspasóz qyzmetiniń úshinshi hatshysy; ekinshi hatshysy.
• 2007-2011 jyldary – QR Parlamenti Senatynyń apparatynda túrli laýazymdardy atqarǵan.
• 2011-2012 jyldary – QR SİM Azıa jáne Afrıka departamentiniń basqarma basshysy.
• 2012-2017 jyldary – Fransıa Respýblıkasyndaǵy Qazaqstan Respýblıkasy Elshiliginiń keńesshisi.
• 2017 jylǵy tamyzda QR SİM Ákimshilik jáne baqylaý departamentiniń keńesshisi boldy.
• 2017-2019 jyldary – QR Parlamenti Senaty tóraǵasynyń keńesshisi; QR Parlamenti Senaty Apparatynyń Halyqaralyq qatynastar, qorǵanys jáne qaýipsizdik komıtetimen ózara is-qımyl bóliminiń meńgerýshisi.
• 2019 jylǵy mamyrdan bastap qyrkúıekke deıin – QR SİM Erekshe tapsyrmalar jónindegi elshisi.
• 2019 jylǵy qyrkúıekten 2021 jylǵa deıingi aralyqta Qazaqstan Respýblıkasynyń Serbıa Respýblıkasyndaǵy Tótenshe jáne Ókiletti elshisi qyzmetin atqardy.