Astanada ótken dástúrli tamyz konferensıasy – elordalyq ustazdardyń basyn qosqan jıyn barysynda ótken oqý jyly qorytyndylanyp, oqýshylardy tárbıeleý men oqytýdaǵy ustazdardy tolǵandyryp júrgen ózekti máseleler, aımaqtaǵy bilim berý júıe­sin jetildirýdegi negizgi maqsat-mindetter aıqyndalyp, jalpy respýblıkada bilim salasyna engizilip jatqan jańalyqtar tanystyryldy.

Tamyz keńesine pedagogıkalyq eńbek ardagerleri, máslıhat depýtattary, bilim berý uıymdarynyń pedagogtary, ata-analar qoǵamdastyǵy, áleýmettik seriktester, BAQ ókilderi jáne shaqyrylǵan qonaqtar (11000-nan astam adam) qatysty. Tamyz keńesine áleýmettik jeli arqyly oblystar, qala mektepteri, orta arnaýly oqý oryndary, mektepke de­ıingi uıymdar, qala turǵyndary onlaın rejımde qatysty.

Jıynǵa qatysýshylardy Astana qalasynyń ákimi Jeńis Qasymbek jańa oqý jylynyń bastalýymen quttyqtap, «Jaıly ınfraqurylymdy qalyptastyrý» taqyrybyndaǵy biryńǵaı respýblıkalyq plenarlyq sesıasyn moderator retinde júrgizip otyrdy.

– Jańa oqý jylynyń bastalýyna sanaýly kúnder qaldy. Bul – oqýshylar men ata-analar úshin de, sol sekildi ustazdar úshin de erekshe kezeń. Búgin muǵalimderdiń dástúrli tamyz konferensıasyn ótkizdik. Qalada úsh aýysymdy jáne shamadan tys júktemesi bar mektepter áli de joq emes. Degenmen biz bul máseleni sheshý ústindemiz. Elordada 14 mektep salynyp jatyr, onyń 11-in aldaǵy oqý jylynda tapsyramyz. Olardyń 3-eýi 1 qyrkúıek­te esigin aıqara ashady. Sonymen qatar Memleket basshysynyń tapsyr­masy boıynsha jaıly mektepterdiń qurylysy qatar bastaldy. Osy ulttyq joba boıynsha 2024-2025 jyldary 24 jaıly mektep salynady. Jańa úlgidegi bilim oshaqtary eki aýysymda 90 myńǵa jýyq oqýshy ornyn qurýǵa múmkindik beredi, – dedi J.Qasymbek.

– Sol sıaqty bizdiń maqsatymyz – kadrlar daıarlaý. Jyl saıyn pedagogıkalyq mamandyqtarǵa granttar bólemiz, ustazdarymyzdy biliktiligin arttyrýǵa jiberemiz, Prezıdent qoldaýynyń arqasynda pedagogtardyń jalaqysy edáýir artty jáne t. b. Muǵalimniń eńbegine tolyq baǵa berý múmkin emes. Olar balalarymyzǵa bilim berip qana qoımaı, áleýetin ashýǵa, erekshe qasıetterin anyqtaýǵa jáne baǵyt-baǵdar berýge kómektesedi. Ustazdar qaýymyna alǵysymdy bildiremin jáne oqý jylynyń jemisti ótýin tileımin! – dedi qala ákimi Jeńis Qasymbek.