Qoǵam qaıratkeri Toǵjan Qojaly mekteptegi orys ádebıetiniń ornyna «Álem ádebıetin» engizýdi usyndy. Bul týraly óziniń facebook paraqshasynda jazdy. 

Qyzyn orys synybyna bergen depýtat mekteptiń memlekettik baǵdarlamasyn qarap, narazylyǵyn bildirdi. Toǵajan Qojalynyń aıtýynsha, 6 synyp oqýshylary jylyna 130 saǵatyn orys tili men ádebıetin oqýǵa arnaıdy. Mekteptegi aǵylshyn tiline 64 saǵat bólinse, qazaq tili men ádebıetine bar bolǵany 84 saǵat arnalǵan.

«Orys tili men ádebıetine bólingen saǵat qazaq tili men ádebıetine qaraǵanda 2 esedeı kóp. Biz qaı memlekette turamyz? Qazaqstanda ma álde Reseıde me? Orys ádebıeti bizge ne úshin kerek? Bizdiń balalarymyzǵa ne sebepti Týrgenev pen Pýshkın Abaıdan artyq, Músirepovten artyq, Chehov Shákárimnen artyq bolýy kerek? Nege?! Biz nege balalarymyzǵa Dıkkensti, Mark Tvendi, Shekspırdi oqytpaımyz?! Bilim mınıstrine suraq: Biz kimbiz? Biz kimdi daıyndap jatyrmyz? Qaıtadan sol Reseıdiń "quldaryn" daıyndap jatyrmyz ba? Álde Qazaqstan azamattaryn ba?»,– deıdi Toǵjan Qojaly.

Toǵjan Qojalynyń aıtýynsha, qyzy bilim alatyn orys synybyndaǵy oqýshynyń 95%-y qazaq.

"Oqý baǵdarlamasyn ózgertý kerek. Orys ádebıeti pániniń ornyna álem ádebıetin engizýdi usynamyn", deıdi Toǵjan Qojaly.