Áleýmettik jelide qazaq tiline qatysty taǵy da daý týdy. Bul joly Almaty qalasyndaǵy «Nemo» delfınarıinde qazaq tilinde qyzmet kórsetilmegen. Naqtylap aıtsaq, atalǵan mekemede shoý baǵdarlamalardyń barlyǵy orys tilinde ótedi eken. Bul týraly jýrnalıst Jazıra Baıdaly óziniń áleýmettik jelidegi paraqshasyna jazdy. 

«2 qyrkúıek kúni 11 adam bolyp Almatydaǵy "Nemo" delfınarııine bardyq. 3 eresek, 8 bala. 15:00-de ishke kirdik. Qoıylym bastaldy. Basynda 10 mınýt boıy sahna artynan mátin oqyldy. Oryssha. Biz qoıylymdy kútip otyra berdik. Sosyn baryp 2 ıtbalyqpen trener ortaǵa shyqty. Ónerlerin kórsetti. Dybystyq súıemeldeme oryssha boldy. Men 20-25 mınýttan keıin syrtqa shyqtym. Kasaǵa baryp "Nege baǵdarlama tutas oryssha?" dep suraq qoıdym. Bıletimdi kórsetip qaıtarýdy talap ettim» – deıdi Jazıra Baıdaly. 

Jeńildikpen alynǵandyqtan, bılettiń aqshasy qaıtarylmaǵan. Kasada bastalǵan daý basshylyqtyń aralasýymen de sheshilmegen. 

Artynsha jýrnalıs 2gis-te pikir qaldyryp, suraǵyn qaıta qoıady. Mekeme onyń bul talabyn “QR Qylmystyq kodeksiniń 174-babynyń 1-tarmaǵy "Ultaralyq alaýyzdyqty qozdyrý” dep baǵalaıdy. Atalǵan mekeme memlekettik statýsy joq bolǵandyqtan baǵdarlamalardy qazaq tilinde ótkizýge mindetti emes ekenin alǵa tartqan.

Osy daýdan keıin 2gis-te pikir qaldyrýshylar sany kúrt kóbeıgen. Kóbi qazaq tiliniń mártebesin aıtyp, shoý baǵdalamalardyń memlekettik tilde ótýin talap etip jatyr.

Qamshy.kz portalynyń tilshisi "Nemonyń" ortalyǵyna habarlasyp, oqıǵanyń mán-jaıyn bilmek boldy. Alǵashynda aty-jónin aıtqysy kelmegen ortalyqtyń qyzmetkeri qazaqsha ótetin baǵdarlamalar baryn aıtty. Degenmen "Qazirgi ýaqytta qandaı shoý qazaq tilinde ótedi?" degen jýrnalısiń saýalyna jaýap bere almady. 

Keıinirek "Nemonyń" PR menedjeri jaqyn arada resmı málimdeme jasaıtynyn aıtty. 

«Biz jaqyn kúnderi osy oqıǵaǵa qatysty Instagram jelisinde túsinikteme beretin bolamyz. Barlyq buqaralyq aqparat quraldaryna habarlasamyz. Biraq dál qazirgi ýaqytta suraqtaryńyzǵa jaýap bere almaımyz», - dep orys tilinde jaýap qaıyryp, tutqany qoıa saldy.

Bir aıta keterligi mekemeniń áleýmettik paraqshasyndaǵy jazbalary da, aqparattyq saıtyndaǵy mátinder de túgeldeı orys tilinde jazylǵan.

Aıta keteıik, «Nemo» delfınarıi 2015 jyldan beri jumys istep kele jatyr. Resmı saıtynda 350-ge tarta balalarǵa reabılıtasıalyq kýrs ótkizgeni jáne 2017 jyly ótken forýmǵa ákimdik qoldaý kórsetkeni jazylǵan.

Osyǵan baılanysty Almaty qalasy ákimdiginiń baspasóz qyzmetine habarlastyq. Baspasóz hatshysy "Bul – tek bir rettik qoldaý bolǵan" dep jaýap berdi. 

Delfınarııge qatysty bul alǵashqy daý emes. Buǵan deıin teńiz janýarlaryn jabyq keńistikte ustap otyrǵany úshin narazylyqtar kóbeıip, jabylý aldynda turǵan. Ortalyqtyń basshysy prezıdent Qasym-Jomart Toqaevqa hat joldap, aýtızm, DSP sıaqty naýqasqa shaldyqqan balalarǵa delfınoterapıa ótkizip otyrǵanyn alǵa tartyp, mekemeni saqtap qalǵan.

Qazaq tiline shyqqan daýǵa pikir bildirýshilerdiń arasynda osy máseleni qaıta kóterip, ortalyqty jabýdy surap otyrǵandar da bar.

Avtory: Ásem Jumaqan