Ulytaý oblysyndaǵy Qarajal óńiriniń turǵyny 28 jastaǵy Araılym esimdi qalyńdyǵy mingen kólikti soǵyp, jol jıegine shyǵaryp jibergen. Atalǵan oqıǵa Qarajal-Qaraǵandy ​​tas jolynda boldy. 

Qaza tapqan qyz ben kúdikti jigit jaqyn arada nekesin qıdyrmaq bolǵan. Alaıda týystary aralarynda kelispeýshilikter týyndap, jigit qyzdy kúnde uryp-soǵatynyn aıtqan. Qaıǵyly oqıǵadan buryn qyz ata-anasyna telefon soǵyp, ony alyp ketýin ótinedi. Biraq ony úıine alyp bara jatqanda, Qarajaldan Qaraǵandyǵa qaraı shyǵa beristegi tasjolda mas kúıeý jigit olardy toqtatyp, kólikteriniń terezelerin temir qubyrmen syndyrǵan.

Keıin kóliktegiler polısıaǵa barmaq bolady. Alaıda ishimdikke toıyp alǵan kúıeý jigit kóliktiń artynan qalmaı, artqy bamperin jáne sol jaq qaptalynan kelip soqqan. Kólik aýdarylyp, aryqqa túsip ketken. Araılym oqıǵa ornynda qaza taýyp, anasy men aǵasynyń dostary jaraqat alǵan.  

"5 tamyzda bes jolaýshysy bar kólik jol apatyna túsip, Qarajal qalasynyń polısıa bóliminde 345-bap 2-bóligi boıynsha "Abaısyzda adam densaýlyǵyna aýyr zıan keltirýge ákep soqqan Jol qozǵalysy erejelerin buzý" tirkeldi. 18 tamyzda 28 jastaǵy jábirlenýshiniń qaza bolýyna baılanysty is 345 - bap 3-bóligine "abaısyzda adam ólimine ákep soqtyrǵan jol erejesin buzý" qaıta qaralǵan, - dep habarlady Ulytaý oblysy PD baspasóz qyzmeti.

Vedomstvo málimetinshe, sotaldy tergep-tekserý barysynda tıisti sot saraptamalary taǵaıyndalǵan. 6 qyrkúıekte saraptama qorytyndysy alynǵannan keıin qylmystyq is 99-bap 1-bóligi "adam óltirý" boıynsha qaıta qaralǵan.

"Basqa zardap shekkenderge qatysty Qylmystyq Kodekstiń 24-baby 3-bóligi jáne 99-baby 2-bóliginiń 1-tarmaǵy boıynsha "eki jáne odan da kóp adamdy óltirýge qastandyq jasaý" boıynsha sotaldy tergep-tekserý bastaldy. Kúdikti ustalyp, ýaqytsha ustaý ızolátoryna qamaldy. Sotaldy tergeý jalǵasyp jatyr. Qylmystyq isti tergeýdi PD men oblys prokýratýrasynyń basshylyǵy baqylaýǵa aldy", - dedi vedomstvo ókilderi.