Ótken senbi kúni Almatydaǵy Arbat alańynda kitap jármeńkesi ótti. Kitapsúıer qaýym beldi baspalardyń kitaptaryn arzan baǵada satyp alyp, súıikti avtorlarymen kezdesý múmkindigin ıelendi. Dástúrge aınalǵan «KitapFest» festıvalinde ılústrasıalyq kórmeler, qazaqstandyq jazýshylar men pikir ıelerimen kezdesý jáne sheberlik saǵaty men baıqaýlar boldy.

İs-shara barysynda kóptegen kitaptardyń tanystyrylymy ótti. Solardyń eń aýqymdysy – «Atamura» baspasynan jaryq kórgen 17 kitaptyń tusaýkeseri. Oǵan memlekettik syılyqtyń ıegeri, belgili jazýshy, baspager Kádirbek Segizbaıuly, jazýshy, satırık Ermahan Shaıhy, M.Áýezov atyndaǵy ádebıet jáne óner ınstıtýty dırektorynyń orynbasary, shyǵystanýshy, zertteýshi Tóreáli Qydyr sıaqty zıaly qaýym men BAQ ókilderi, ult janashyrlary qatysty.

Sóz basyn alǵan “Atamura” korporasıasynyń prezıdenti Raqymǵalı Abraruly shyǵarylyp jatqan kitaptar Abaıdan bastap búgingi tiri klasıkterdiń eńbegin basyp jatqanyn aıtyp, baspanyń basty jumystaryn, baǵyt-baǵdaryn tilge tıek etti.

"Jańa oqý jylynyń qarsańynda dástúrge aınalǵan jańa kitaptardyń jaryqqa shyǵarýdy jón sanadyq. Munda qazaqtyń maqal-mátelderi men jumbaqtary batyrlyq jyr-dastandar, lıro-epostyq jyrlar, sheshendik sózder men ańyz, ertegiler jınaqtalǵan. Bilesizder, bir ǵana maqaldyń óziniń birneshe nusqasy bolýy múmkin. Sol úshin ádebıet jáne óner ınstıtýty ǵalymdarynyń súzgisinen ótkizdik" – degen Raqymǵalı Abraruly kómek bergen ınstıtýtqa alǵys aıtty.

M.Áýezov atyndaǵy Ádebıet jáne óner ınstıýty dırektorynyń orynbasary Tóreáli Qydyr shyǵarylǵan kitaptardyń túr-túsine erekshe toqtaldy.

– "Sary tús – baılyqtyń, sheksiz rýhanı mahabbatyń belgisi. Kitaptyń syrtqy túri men ishki mazmuny sáıkes keledi. Biz túrki halyqtarynyń ishindegi aýyz ádebıetke eń baı halyqpyz. 100 tomdyq babalar sózin shyǵarǵanbyz. Budan bólek ınstıtýt qorynda 40 myńǵa jýyq qoljazba saqtaýly tur. Osydan taǵy da 100 tom shyǵarýǵa bolady» – dedi Tóreáli Qadyr. 

Elimizdegi eń aýqymdy "Atamura" baspasynan bólek endi qadamdap jolyn bastap, az ýaqyt ishinde aıtýly jetisterge jetip úlgergen baspalar da bar. Solardyń biri – "Mazmundama" baspa úıi. Jármeńke qatysýshylarynan da pikir surap, aqparat aldyq.

"Mazmundama" baspasynyń shyǵarýshy redaktorlarynyń biri Qanymaı Baıdetova jármeńkege jáne baspa úıiniń erekshelikterine toqtaldy: 

– "Baspanyń ereksheligi – tuńǵysh ret sammarı, non-fiction jáne álemdik bestseller kitaptardy qazaq tiline aýdarma jasalady. Qurylǵanyna az ǵana ýaqyt ótse de, 200-den astam kitap jaryq kórip, oqyrmandardyń súıispenshiligine bólenýde. Osy kitaptardyń ishinde erekshe oryn alatyny – aýdarma bestsellerler jáne qazaq kórkem ádebıeti. Sondaı-aq "Balalarǵa bazarlyq" atty jańa serıa qolǵa alynyp, biraz kitap tamyz aıynda jaryq kórdi.

Búgingi jármeńkede "Mazmundama" oqyrmandarynyń sany kóbeıip jatqany aıqyn sezildi. Kitapqa suranys joǵary. Ásirese jastardyń qyzyǵýshylyǵy erekshe ekeni baıqalady. Kóp satylǵan kitaptar degende, negizi, olardy bólip-jarýǵa kelmeıdi. Barlyq janrdaǵy kitaptar teńdeı satyldy. Biraq erekshe suranysqa ıe kitaptardyń qataryna "Memleketter nege damymaı qalady", "Alhımık", "Atom ádetter", "Parfúmer", "Pikirtalas óneri", "Stıv Djobs" jáne balalarǵa arnalǵan kitaptardy atap ótse bolady".

Suranysqa kóp ıe bolǵan kitaptardyń biri – "Tarmaqtar". Kitaptyń avtory Rysgúl Dosjanova erekshe formattaǵy jınaqty shyǵarý ıdeıasy qalaı kelgenin, ekinshi basylymyń ózgeshiligi jaıynda aıtyp berdi: 

– Jalpy, Tarmaqtar degen ataýdyń ózi áleýmettik jelidegi kishkentaı paraqshadan bastalyp, kitapqa aınaldy. Sebebi, jeli betterinde emes, kitap betterinde atymyzdyń qalǵanyn qaladym. Solaı birinshi kitap dúnıege keldi. Birinshi kitapty shyǵaratyn kezde bizdiń qarjylaı múmkindigimiz bolmady. Kóp kásipkerdiń aldyna bardym. "Kitap oqymaıtyn qoǵamda kitap shyǵarǵany nesi" dep biraz esik jabyldy. Óıtkeni, bul kitaptyń ózge kitaptardan qaraǵanda jumysy ári shyǵyny da qaltaǵa biraz salmaq salady. Sóıtip júrip, 1 jyldyń ishinde shyǵardyq qoı. Suranystyń kóptigi bizdi qatty tańqaldyrdy.