Áleýmettik jelide eks-prezıdent Nursultan Nazarbaevtyń Barselonada jańa klınıkasy ashylǵany týraly aqparat tarady. Dala Inside  telegram arnasyndaǵy málimetke súıensek, Nazarbaevtar áýletine tıesili «Mediker» klınıkasy osydan 4 jyl buryn salyna bastaǵan. Atalǵan klınıka súıek jasýshalarynan jańa kletka jasap, jasartýmen aınalysady. Beıresmı derekte atalǵan klınıkaǵa 5 mlrd teńge jumsalǵan dep kórsetilgen.

Ispanıanyń Barselona qalasynda «Mediker» atty regeneratıvti klınıka ashylǵany ras. Klınıkanyń arhıtektýrasyn «Talleres inox» qurylys kompanıasy jasaǵan. Olardyń resmı saıtynda qurylys áli jalǵasyp jatyr dep kórsetilgen. Sondaı-aq tapsyrys berýshi retinde ıspanıalyq Grupo Elecnor kompanıasy jazylypty.

«Bul – Barselonadaǵy joǵary deńgeıdegi ruqsatnamasy bar mamandandyrylǵan jekemenshik aýrýhana. Jańadan salynǵan aýrýhana basqalarǵa uqsamaıdy ári arhıtektýranyń erekshe sımvoldyq týyndysy retinde qarastyrylady», delingen qurylys kompanıasynyń resmı saıtynda.

«Mediker» klınıkasynyń jalpy terıtorıasy – 4192 sharshy metr. Klınıkada birneshe qyzmet túri bar: stomatologıa, reabılıtasıa, travmatologıa men plasıkalyq hırýrgıa. Budan bólek, aýyr operasıadan keıingi reanımasıa bólimimen jabdyqtalǵan zamanaýı hırýrgıalyq blok bar.

Qazaqstannyń birneshe qalasynda «Mediker» aýrýhanasynyń fıllıaldary bar. Klınıkanyń basqarýshy dırektory retinde 2021 jyldan búginge deıin Bazarbaev Sabyrjan Erkinuly dep kórsetilgen. Degenmen ol týraly ne áleýmettik jelide, ne ǵalamtorda tolyq aqparat joq.