Almaty oblysynyń elýden asa bıznes ókilderi men  syrtqy ekonomıkalyq qyzmettiń (SEQ) qatysýshylary «Alataý – OKB» kedendik beketiniń jumysyn jańartýdy talap etti. Bul týraly «Qamshy» portaly habarlaıdy.  Búgin kásipkerler Almaty qalasynda osyǵan baılanysty arnaıy baspasóz májilisin ótkizdi.

«Alataý – OKB» kedendik beketin taratýdyń nátıjesinde oblys aýmaǵynda óndiristik jáne qoıma keshenderi ornalasqan kásipkerler Almaty qalasy jáne Taldyqorǵan qalasyndaǵy Almaty oblysy Memlekettik kirister departamentine (MKD) qarasty kedendik beketterdegi júkterin keden aýmaǵynan tazartyp,  280 shaqyrymnan asa qashyqtyqqa jóneltýge májbúr bolýda.

Sonymen qatar, İle aýdanyna júkterdi keri tasyp áketý qajet bolǵandyqtan, bul kólikke jumsalatyn shyǵyndardyń aıtarlyqtaı ósýine, osynyń nátıjesinde ónimder men taýarlardyń ózindik qunynyń qymbattaýyna ákelýde dep atap ótti kásipkerler. «Bul İle aýdany kásipkerleriniń quqyqtaryna qysym jasaý bolyp tabylady», - dep esepteıdi SEQ qatysýshylary.

       Júk alýshylardy óz júkterin kedennen tazartý úshin Taldyqorǵan qalasyndaǵy Almaty oblysy MKD-ne jáne Almaty qalasy MKD-ne barǵyzbastan, osyǵan deıin jumys jasap kelgen kedendik bekettiń jumysyn qalpyna keltirý oryn alǵan osy jaǵdaıda jasaýǵa bolatyn jalǵyz durys sheshim bolyp tabylady degen pikirde kásipkerler. Olar osy máseleni sheshý úshin Úkimettiń qoldaý kórsetýin surap otyr.

Elbasynyń Úkimetke arnalǵan jyl saıynǵy joldaýynda Qazaqstan damyǵan elderdiń tabysty tájirıbesin úırenýi kerek degen erekshe tapsyrma qoıylǵan bolatyn. Óıtkeni, shaǵyn jáne orta bızneske kórsetiletin memlekettik qoldaýdyń tetikterin jetildirý - el úkimetiniń udaıy nazarynda turatyn másele.