Tanymal jýrnalıs Janat Baqytqa áleýmettik jelidegi dinı jazbalary úshin 172 500 teńge aıyppul salyndy. Bul týraly Atyraý oblysy Din ister basqarmasy habarlady. Vedomstvaǵa Atyraý oblysy turǵyndarynyń atynan birneshe aryz kelip túsken. 

"Aryzda áleýmettik jelide tanymal jýrnalıs jelidegi paraqshalary arqyly ıslam dinine til tıgizip, barsha musylmandardyń, sonyń ishinde jeke dinı sezimine qorlyq jasalǵanyn kórsetken. Osy rette basqarma tarapynan Instagram áleýmettik jelisindegi Zhanat Baqyt jáne zhan_zhihany parashalary Din isteri komıtetine dintaný saraptamasyn jasaýǵa joldaǵan bolatyn. Saraptama qortyndysy negizinde, bul paraqshalarda shynymen ıslam senimin ustanatyn azamattardyń dinı senimin qorlaýǵa jáne óz kezeginde qoǵamda túrli dinı talas-tartystarǵa sebep bolatyn aqparattar jarıalanǵany anyqtaldy. Qazirgi tańda Almaty oblysy Talǵar aýdanynyń sotynyń sheshimimen paraqshalardyń ıesi kináli dep tanylyp aıyppul salynǵanyn habarlaımyz. Aldaǵy ýaqytta bul paraqshalardy buǵattaý úshin aqparatty Mádenıet jáne aqparat mınıstrligine jiberemiz", -  deıdi Atyraý oblysynyń Din isteri basqarmasynyń bas mamany Erlan Erǵalıev

Atyraý oblysy Din isteri basqarmasy QR Dinı qyzmet jáne dinı birlestikter týraly zańynyń 3 baby 5 tarmaǵyna sáıkes jeke tulǵalardyń dinge kózqarasy sebepteri boıynsha azamattyq quqyqtarynyń buzylýyna nemese olardyń dinı sezimderin qorlaýǵa, qandaı da bir dindi ustanýshylar qasterleıtin zattardy, qurylystar men oryndardy búldirýge jol berilmeıtinin eskertti.