Polıseıler Qazaqstan men Reseı shekarashylary arasyndaǵy qaqtyǵys týraly jalǵan vıdeo avtoryn ustady, - dep habarlaıdy Qostanaı oblysynyń Polısıa departamenti.

"Áleýmettik jelide Qostanaı oblysynyń shekarasynda áskerıler arasynda bolǵan qaqtyǵysqa qatysty pikir jazylǵan áskerı kólik kolonnasynyń vıdeosy tarap ketti. Vıdeo jalǵan bolyp shyqty. Jedel izdestirý is-sharalary barysynda Qostanaı oblysynyń PD qyzmetkerleri Qostanaı qalasynyń 52 jastaǵy turǵynyn anyqtap, ustady. Ol qasaqana áreket jasaǵany úshin kinásin moıyndady", delingen habarlamada. 

Derek boıynsha Qylmystyq kodekstiń 274-baby 2-bóligi 3-tarmaǵy "Buqaralyq aqparat quraldaryn nemese telekomýnıkasıa jelilerin paıdalana otyryp, kórineý jalǵan aqparat taratý" boıynsha sotaldy tergeý bastaldy.

Polısıa jalǵan aqparat taratqany úshin qylmystyq jáne ákimshilik jaýapkershilikti eske alyp, azamattardy aqparatty taratpastan buryn onyń durystyǵyn tekserýge shaqyrdy.

Eske salsaq, áleýmettik jelide tarap jatqan vıdeoda áskerı kıimdegi adamdar men áskerı tehnıka kórsetilgen. Kadr syrtyndaǵy daýys qaqtyǵys Qostanaı oblysynda bastalyp, qazir tehnıka sonda tartylyp jatqanyn aıtady.