«Aqkent» turǵyn úı kesheniniń turǵyndary jóndeýden keıin óz páterlerine qonystandy. Órtten zardap shekken 96 turǵyn úıdiń 95-i retke keltirildi, 1 páterdiń ıeleri jóndeý jumystaryn júrgizýden bas tartty. Qazirgi ýaqytta úı 100% qonystanǵan.

«Almaty ákimi Erbolat Dosaevtyń tapsyrmasy boıynsha jáne aýdan ákimdiginiń qoldaýymen TJD rezervinen páterlerdi kosmetıkalyq jóndeýge qarajat bólindi. Qurylys salýshy kabeldi aýystyrý, esepke alý qurylǵylaryn, kireberis, lıft jáne qabat alańdaryn qalpyna keltirý jumystaryn tolyq júrgizdi»,  – dep atap ótti Alataý aýdanynyń ákimi Azamat Qaldybekov.

Búgin úı turǵyndary úshin otbasylardyń páterlerge oralýyna oraı is-shara uıymdastyryldy. Úı turǵyndarynyń biri Jánibek Qulybaevqa aýdan ákimi úı turǵyndaryn óz ómirine qaýip tónse de    ózgelerdi qutqarǵany úshin alǵys hat tabys etti.

Injenerlik komýnıkasıalar men kireberisterdiń jaı-kúıi úshin jaýapkershilikti qurylys salýshy - «Ayt Housing Complex» JSHS óz moınyna aldy. Elektr energıasy, sýmen jabdyqtaý aǵymdaǵy jyldyń 2 qyrkúıeginde tolyǵymen qalpyna keltirildi.

«Ákimdik tarapynan turǵyndarǵa 2 aıǵa páter jaldaý qarjylandyryldy. Osy 2 aıdyń ishinde biz qurylys salýshy retinde óz bastamamyzben úıdiń jalpy aýmaǵyn qalpyna keltirdik – shahtalar, elektr kabelderi, shahtalardaǵy esikter alúmınıge aýystyryldy, barlyq kabelder tóseldi, elektr eseptegishteri qalpyna keltirildi. Jalpy alańdarda kúrdeli jóndeý júrgizildi. Sondaı-aq, syrtqy órt satysy, órt dabyly, jeldetkishter, tútin murjalary – bul barlyq júıe jumys isteıdi, biz ony ákimdik qyzmetkerlerimen synap kórdik», – dedi Ayt housing Complex qurylys kompanıasynyń bas dırektory Qanat Eralıev.

Páterlerdi jóndeýmen aqaýly aktiler negizinde «Bolashaq Qurylys-S» JSHS aınalysqan. Merdigerdiń aıtýynsha, olar turǵyndar tilekterin qolda bar búdjet aıasynda jeke eskerýge tyrysty. Jóndeý joǵarǵy qabattardan bastaldy. Úı turǵyndary páterler daıyn bolǵan kezde oraldy: 10 qyrkúıekte qonystaný prosesi bastaldy.

«Barlyq páterlerdiń ıisi óte aýyr boldy. Munda ozondaý tehnologıasy qoldanyldy. Bul páterlerdegi aýany belgili bir óńdeýge ári ıisti ketirýge múmkindik berdi. Qazir úılerdegi aýa taza, adamdar qonystanýda, barlyǵy rıza», - dep atap ótti «Bolashaq S qurylys» JSHS jobasynyń basqarýshysy Sergeı Kovalev.

TJD málimetinshe, Aqkent shaǵyn aýdanyndaǵy barlyq 58 úıde órt qaýipsizdigi tekserildi. Anyqtalǵan buzýshylyqtar negizinen apattyq shyǵýlardyń bitelýimen baılanysty boldy. TJD qyzmetkerleri qala boıynsha órt-taktıkalyq oqý-jattyǵýlar, kóppáterli turǵyn úılerdiń turǵyndarymen jáne MIB, PIT ókilderimen órt qaýipsizdigi talaptaryn túsindirý boıynsha profılaktıkalyq kóshpeli áńgimeler ótkizedi. Ókinishke oraı, turǵyndar baspaldaq alańdary men evakýasıa joldaryn jaýyp tastaǵan jaǵdaılar áli de tirkelýde. Sondyqtan aldyn alý jalǵasýda, túsindirme jumystarymen esepke alynǵan 1079 kópqabatty úı qamtylady.

Eske salsaq, 1 tamyzda Aqkent sh/a turǵyn úıinde órt boldy. Úıdiń 300-den astam turǵyny evakýasıalandy. Buǵan deıin Prezıdenttiń tapsyrmasy boıynsha 6 adam «Erligi úshin» medalimen marapattalǵan bolatyn.