Aqtaýdaǵy "Oımasha" oqý polıgonynda jarylys bolyp bir sarbaz qaza tapty, dep habarlaıdy Lada.kz aqparat agenttigi. Qazir osy jaǵdaıǵa baılanysty sotqa deıingi tergeý jumystary júrgizilip jatyr.
"Qylmystyq kodekstiń 453-baby, 2-bóligi (Qyzmetke salǵyrt qaraý, adam ólimine ákep soqqan áreket) boıynsha is qozǵaldy. Ólimniń naqty sebebin anyqtaý maqsatynda máıitti ashyp qaraǵan. Qazirgi kezde saraptamanyń nátıjesin kútip otyrmyz. Jaryqshaqtar tabylǵan jaǵdaıda qosymsha saraptama taǵaıyndalady. Sebebi bógde zattyń quramy men shyqqan jerin anyqtaý qajet", - dedi Aqtaý garnızonynyń bas áskerı prokýrory Erlan Qutqoja.
Jarylys polıgonnyń oqý-jattyǵýlar ótetin jerde emes, basqa jaǵynda bolǵan. Sol kezde sarbazdar turmystyq kúl-qoqysty jınap júrgen.
"Jarylys kezinde taǵy bir kelisimshart boıynsha áskerı qyzmetshi, 2000 jyly týǵan serjant jaraqat aldy. Oǵan jelke tusynan tıgen. Qazir ol aýrýhanada, jaǵdaıy jaqsy, ómiri men densaýlyǵyna qaýip tónip turǵan joq", - dep atap kórsetti garnızonynyń bas áskerı prokýrory.
Pikir qaldyrý