İshki ister vıse-mınıstri Marat Qojaev Almatydaǵy aqyly mektepte zorlyq kórgen bala týraly pikir bildirdi. 

«Bul jerde men sizge jalǵyz dúnıe aıta alam. Atalmysh jaıt oqıǵalardyń biryńǵaı júıesine tirkelip, sotqa deıingi tergeý bastaldy. Qazir tergeý barysyna pikir bildirip, onyń qorytyndysyn aldyn ala kesip aıta almaımyn. Qylmystyq-prosessýaldyq zań tergeý barysyndaǵy málimetterge pikir bildirýge tyıym salady. Sondyqtan tergeýdiń aıaqtalýyn kúteıik. Ne bolǵanyn sol kezde túsinemiz», - dedi vıse-mınıstr Úkimet otyrysynan keıin ótken baspasóz máslıhatynda.

İİM ókili búgingi tańda oqıǵa boıynsha kúdikti anyqtalmaǵanyn aıtady.

«Ázirge ondaı (kúdikti týraly - red.) málimet joq. Tergeý, qajetti sharalar júrip jatyr. Saraptama taǵaıyndalǵan. Beınekameralardy qarap, qajetti saraptamanyń bári jasalyp jatyr», - dedi vıse-mınıstr.