Pavlodarlyq qoǵam belsendisi Dıas Quzaıyrdyń ústinen qylmystyq is qozǵaldy. Sol baıaǵy 174 bap (ult arazdyǵyn týdyrý). Sondaǵy bar aıyby – Rıdder qalasynyń ákimshilik qyzmetkerlerinen memlekettik tildi nelikten bilmeıtindikterin jáne qansha ýaqytta úırenetinin suraǵany.

Ol vıdeony kórip shyqqan jýrnalıs Muhtar Túmenbaı áleýmettik jelide óz pikirin jazǵan eken:

"Dıas ne daýys kótergen joq, ne balaǵat sóılep, bireýdiń ultyna ne násiline qatysty sóz aıtqan joq, zańsyz talaptar da qoıǵan emes. Tek memlekettik qyzmetkerlerdiń memlekettik tildi bilmeý sebepterin anyqtamaq boldy jáne úırenetin oılary bar ma dep surady. Boldy. Basqa dáneńe de joq. Bári sypaıy ótti.

Meniń suraıyn degenim, qashannan beri Qazaqstan zańdarynyń oryndalýyn talap etý qylmys bolyp sanalatyn bolǵan? Basqasy basqa, memlekettik qyzmetkerlerlerdiń memlekettik tildi bilýi shart. Zańmen bekitilgen shart. Onsyz azamat memlekettik organda jumys isteı almaıdy.

Alaıda, baıqap otyrsam, Rıdder qalasynyń ákimshiligi óz zańdarymen ómir súretinge uqsaıdy. Olarǵa Qazaqstan zańdary zań emes. Ol azdaı, Dıas sıaqty jaq ashqandardy qýdalaýǵa kóship otyr. Tipti Rıdder qalasynyń huqyq qorǵaý organdary erinbeı, Pavlodarǵa baryp, Dıastyń úıine basa kóktep kirip, tintý júrgizgen. Qandaı negiz boldy tintý júrgizýge? Ol ne, ekonomıkalyq qylmys jasap pa, paraqorlyqpen ustaldy ma, álde memleketke satqyndyq jasady degen aıyp taǵylyp otyr ma? Ne izdedi onyń úıinen Rıdder saqshylary? Jalpy qylmystyq is qozǵaýǵa ne negiz boldy? Sóıtsek, ákimshilik qyzmetkerlerinen túsken bir paraq aryz shaǵym eken.

Já, ony da jón deıik. Aryz tústi me, ony qabyldap, anyq-qanyǵyn anyqtaý – huqyq qorǵaý organdarynyń mindeti. Biraq erteń Dıastyń eshbir qylmystyq is jasamaǵany anyqtalatyn bolsa, onda jańaǵy aryz-shaǵym túsirgen adamdar jalǵan jala japqany úshin jaýapqa tartylýy tıis. Ondaı da bap bar qylmystyq kodekste. 2 jylǵa deıin bas bostandyǵynan aıyrý kózdelgen. Sony bile me eken aryzdanýshylar? Jáne keshegi tintý júrgizgen polıseıler olardy jaýapqa tartýǵa ázir me?".