Almatyda qańtar oqıǵasy kezinde zaqymdanǵan qala ákimdiginiń ǵımaratyn rekonstrýksıalaý aıaqtaldy.

Ǵımarattyń tarıhı kelbeti saqtalyp, zamanaýı tehnologıa men qurylys standarty eskerilip, qalpyna keltirildi. Qyzmetkerler men kelýshilerdiń qaýipsizdigi eskerildi, tıimdi energıa tutyný tehnologıasy paıdalanyldy.

Sonymen qatar, azamattardyń barlyq sanatynyń jaılylyǵy úshin ınklúzıvti sheshimder engizildi.

Rekonstrýksıadan keıin kabınetterdiń aýdany ózgerissiz qaldy, al ǵımaratta 14 basqarma men ákim apparaty ornalasady.

Qalalyq ákimdik ǵımaratynda energıa únemdeý tehnologıalary qoldanylyp, órtke tózimdi materıaldar paıdalanyldy, sondaı-aq barlyq qabattar boıynsha órt sóndirý jáne kirýdi baqylaý júıeleri bar. Sonymen qatar, halyqaralyq standarttardy eskere otyryp, ǵımarattyń seısmıkalyq kúsheıýi men jer silkinisine tózimdiligi boıynsha úlken jumys júrgizildi.

«Ákimdik ǵımaratyn rekonstrýksıalaý kezinde bólshekteý barysynda belgili bir qıyndyqtar baıqaldy. Mysaly, órt kezinde birneshe plıtalar beriktigin joǵaltty jáne olardy jańa jolmen toltyryp, kúsheıtýge týra keldi. Seısmıkalyq kúsheıtý jumystary aıasynda metaldyń kóp mólsheri jumsaldy, qazir bul jumystar kórinbeıdi, biraq tótenshe jaǵdaı kezinde berik konstrýksıalar ǵımaratty saqtap qalýǵa múmkindik beredi», - dedi «Atrıks-Stroı» JSHS qurylys kompanıasynyń dırektory Ámirjan Nábıev. 

Onyń aıtýynsha, Almaty ákimdiginiń ǵımaraty rekonstrýksıadan keıin jer silkinisi bolǵan jaǵdaıda 10 balǵa tótep bere alady.