Aqtóbe oblysynyń burynǵy ákimi Ermek Imantaev ashtyq jarıalady, dep habarlaıdy KTK arnasy. Oǵan laýazymdyq ókilettigin asyra paıdalanyp, jer ýchaskelerin óz baǵasynan tómen satty degen aıyp taǵylǵan bolatyn
Imantaev ózine taǵylǵan aıyppen kelispeı otyr. Ol jerdi zańsyz satqany úshin jaýapqa tartylyp jatyr. Qazirgi kezde eks-ákim tamaqtan da, sýdan da bas tartty. Jubaıynyń aıtýynsha, Imantaevtyń nár tatpaǵanyna jeti kún bolǵan. Densaýlyǵy da nasharlaı bastaǵannan sot otyrysyna da kele almaǵan. Osyǵan baılanysty keshegi otyrysty keıinge qaldyrýǵa týra kelgen.
"Búgin men tergeý ızolátoryna kúıeýim Ermek Imantaevqa bardym. Ony zembilmen alyp shyqqanyn kórdim. Jaǵdaıy óte nashar, áreń sóılep jatyr. Biraq esin biledi, qylmystyq is boıynsha qosymsha tergeý júrgizýdi talap etip otyr", - deıdi Leıla Imantaeva.
Onyń aıtýynsha, eks-ákim istiń jan-jaqty qaralǵanyn qalaıdy. Barlyq adam zań aldynda jaýap berýi kerek.
Aıta keteri, bıyl aqpan aıynda Aqtóbe oblysynyń burynǵy ákimi Ermek Imantaev qyzmettik ókilettigin teris paıdalanǵan dep aıyptaldy.
Oǵan laýazymdyq ókilettigin asyra paıdalanyp, jer ýchaskelerin óz baǵasynan tómen satty degen aıyp taǵylǵan bolatyn. Saldarynan memleketke 199,4 mln teńge zalal keltirilgen.
Ermek Imantaev 2002 jyldyń sáýirinde Aqtóbe oblysynyń ákimi qyzmetine taǵaıyndalǵan bolatyn. Osy laýazymda 2004 jyldyń shildesine deıin boldy. Odan keıin prezıdent ákimshiligine aýysyp, memlekettik baqylaý jáne uıymdastyrý bóliminiń ınspektory boldy. Esep komıtetinde eńbek etti.
2019 jyldyń qarasha aıynan bastap 2021 jyldyń naýryzyna deıin "Aqtóbe" áleýmettik-kásipkerlik korporasıasyn basqardy.
Pikir qaldyrý