5 qazanda jýrnalıs Evgenıa Baltatarova da Qazaqstan bıligi Natalá Narskaıany 25 qazanǵa deıin Reseıge ekstradısıalamaq bolyp otyrǵanyn jazǵan. Onyń boljamynsha, Qazaqstan bas prokýratýranyń sheshimi de shyǵyp qoıǵan bolýy yqtımal.

Reseıdiń Ýkraınaǵa basqynshylyǵyn aıyptap suhbat bergen reseılik Natalá Narskaıa eki aıdan beri Qazaqstan abaqtysynda otyr. 22 shildede Almaty polısıasy ony Reseıdiń suraýy boıynsha ustaǵan. Keıin sot Narskaıany 12 aıǵa qamaý týraly sheshim shyǵardy.

Osy ispen aınalysyp jatqan adam quqyqtary jónindegi búro qyzmetkeri, quqyq qorǵaýshy Denıs Jıvagonyń aıtýynsha, Narskaıa Qazaqstannan bosqyn mártebesin surap, ótinish tastamaǵan. Sondyqtan Qazaqstan ony ekstradısıa tártibimen Reseıge bere alady. Eger ol resmı Astanadan bosqyn mártebesin surasa, Qazaqstanda shamamen bir jylǵa deıin qala alady.

Denıs Jıvagonyń sózinshe, buǵan deıin Narskaıa kelisimshart, qujattardy jyrtyp tastaǵan. Quqyq qorǵaýshy "qamaýdaǵy Reseı azamatynyń psıhıkalyq jaǵdaıy qıyn" deıdi.

Qazaqstan bas prokýratýrasy ázirge buǵan qatysty reaksıa bildirmedi.

29 jastaǵy Natalá Narskaıa soǵysqa deıin Reseıde vokaldan sabaq bergen. Reseı Ýkraınaǵa basyp kirgen soń Almatyǵa kóshken. Oǵan Reseıde "buqaralyq aqparat quraldary arqyly ekstremıstik áreketke shaqyrdy, áleýmettik arazdyq qozdyrdy" degen aıyp taǵylyp, halyqaralyq izdeý jarıalanǵan.

Quqyq qorǵaýshynyń aıtýynsha, Narskaıanyń qýdalanýyna YouTube-tegi arnalardyń birine bergen suhbaty ilik bolǵan. Onda Narskaıa Reseı bıligi men soǵysty qoldaıtyn reseılikterdi synaıdy. Narskaıa suhbatta ózin "rýsofobpyn" dep ataıdy.