Keshe ǵana alaıaqtyqtyń jańa túrin estip, shoshynyp qaldyq. Bul týraly jýrnalıs Sabına Qazaqbekova «ákemniń atynan alaıaq Jýsan bankten 4,5 mıllıon nesıe alyp, aldap ketti», dep dabyl qaqty.

Sabınanyń aıtýynsha, ákesi ara-tura «Iandeks taksımen» tabys tabady. 1957 jylǵy. Úsh kún buryn bir jolaýshy taksıge otyryp, aqysyn tóleıtin kezde «Aǵa, kaspıińizge aqsha aýdarylmaı jatyr, telefonyńyzdy bere turyńyzshy» dep, telefonyn surap alǵan. Ákesiniń oıynda túk joq, bere salǵan. Jaman oıy joq, aqkóńil, ańǵal adam ǵoı.

Álgi alaıaq telefondy alyp, lezde «Jýsan» banktiń mobıldi qosymshasyn ornatyp, akkaýnt ashyp, ákesiniń atynan nesıe rásimdep jibergen. Onymen qoımaı, «aǵa, sizdiń sýretińizdi surap jatyr» dep sýretke túsirip, bıometrıasyn alǵan.

– Sóıtip, álgi alaıaq ákemniń atynan «Jýsan bankten» 4,5 mıllıon teńgege nesıe rásimdep aldy. Meniń túsinbeıtinim, 70 jasty alqymdaǵan kisige «Jýsan bank» qalaısha 4,5 mıllıon teńgeniń kredıtin op-ońaı bere saldy? Byltyr 60-tan asqan apama «jasyńyz asyp ketken» dep, 500 myń teńgeden artyq bermeı qoıǵan. Onyń ózin rásimdeý úshin jarty kún ýaqytymyz ketken, deıdi Sabına.

Jalpy, mundaı jaǵdaı keıingi kezde kóp adamnyń basynan ótken kórinedi. Qamshy.kz «Jýsan bankke» habarlasyp, onlaın kredıtke baılanysty saýalnama tastaǵan bolatyn. Olar bergen málimet boıynsha, bul bank kepilsiz jáne kez kelgen maqsatqa 8 mln teńgege deıin kredıtti onlaın beredi. 18 jastan asqan Qazaqstan azamaty osy somaǵa deıin nesıe rásimdeı alady. Jas shekteýi joq! Zeınetkerlerge de nesıe bere beredi eken. Nesıe alýshynyń tabys kózi, basqa da málimetteri qaralmaıdy, jeke kýálik nemese tólqujattaǵy aqparatty toltyryp, kameraǵa sýretke tússeń boldy.

Al jábirlenýshiniń oqıǵasyna oralsaq, «alaıaq rásimdegen kredıtti qolyna qalaı aldy?», degen suraq týyndady.

– Ákeme alaıaq «meni birneshe mekenjaıǵa aparyńyz» dep, birneshe bankomattan aqshany bólip shyǵaryp alypty. Birinshi kúni 1 mln shyǵarǵan. Ertesinde «aǵa, men kásippen aınalysatyn edim, júrgizýshi kerek bolyp tur», dep shaqyrtady. Ol kúni taǵy da mıllıon teńgesin shyǵaryp alady. Basqa mıkrokredıttik uıymdardan da aqsha alady. Ákemnen ylǵı telefon suraǵan. Ol bere bergen. Keıinnen ákem seziktenip, anyqtaǵanda, óziniń alaıaqqa aldanǵanyn biledi. İshki ister bólimine barsa, álgimiz ataqty ury eken. Endi zańger jaldaýymyzǵa týra keledi, deıdi jábirlenýshiniń qyzy.

Eń qyzyǵy, qarıa aldanǵanyn áli bilmeı júr dese kerek, alaıaq taǵy habarlasady. Qalǵan somany da alǵysy kelgen sekildi.

– Sodan ákem aǵammen baryp, bir «operdi» shaqyrtyp, ustap berdi. Alaıaqtyń ózi habarlasyp, shaqyrǵanyn kózimen kórgen «oper» ony DVD-ǵa apardy. Biraq prokýrordyń sanksıasy joq dep, jibere salypty. Polısıa departamenti óte sylbyr qımyldap jatyr. Álgi alaıaqqa qansha adamnan aryz tússe de, ol bostandyqta áli júr. Áli qansha adamdy aldaıtynyn kim bilsin, deıdi Sabına.

Qarıa onlaın nesıeni op-ońaı rásimdeý saldarynan alaıaqqa bir urynsa, endi polıseılerdiń sharasyzdyǵynan taǵy kúıinýde.

Onlaın nesıeni elimizdegi iri bankterdiń biri Jusan Bank op-ońaı kez kelgenge bere berse, qalǵan maıda mıkrokredıtterden ne suraımyz?

Áıteýir, aldanǵan halyq. İshki ister bóliminiń túri anaý. Kimge senemiz?