Depýtat Baqytjan Bazarbek "Jer Amanaty" komısıasy boıynsha memleketke qaıtarylǵan jerlerdiń qaıtadan olıgarhtarǵa berilip jatqanyn aıtty. 

"Jer Amanaty jobasynyń komısıasy 8,5 mln gektar jerdi qaıtardyq. Qaıtarylǵannyń kóbisi jaıylymdyq jer. Alaıda sońǵy ýaqytta sol jerlerdi jergilik jemqor ákimder olıgarhtar men baqýatty adamdarǵa qaıta bergenin estidik. Bul týraly Aıdarbek Saparov bile me? Sol jerdi qaıta berip jatqan ákimderdiń aty-jónin atasyn", dedi Baqytjan Bazarbek. 

Buǵan qatysty Aýyl sharýalyǵynyń mınıstriniń orynbasary Ábilqaıyr Tamabek jaýap berdi. 

"Qaıtarylǵan jerdiń 2,6 mln gektar jer qaıta aınalymǵa engizildi. Memlekettik atqarýshy bılik qaıtarǵanymen jerdi bólý rásimi ákimdikterdiń qolynda. 2,2 mln gektar jer qaıtadan bólinip berse, 1,6 mln gektary eldi-mekenniń jaıylymdyq jerin keńeıtýge berilgen", dedi vıse-mınıstr. 

Depýtat vıse-mınıstrdiń jaýabyna qanaǵattanbaı suraǵyn qaıta qoıdy. 

"Men sizge ákimderdiń aty-jónin atańyz dedim. Ákimderge shara qoldanylmaǵan. Sol sebepti olardyń aty-jóni kerek. Sosyn biz kerekti sharany qoldanamyz. Al jumys isteı almasańyzdar mınıstrińizben birge qýyp shyǵamyz. Biz aıamaımyz", dep ashýlandy depýtat. 

Májilis tóraǵasy Erlan Qoshanov depýtattyq etıkany saqtaýdy surap, Baqytjan Bazarbekke eskertý jasady.