Mınıstr zań organdary men buqaralyq aqparat quraldaryna bundaı jańalyqtardy abaılap taratý kerek ekenin eskertip ótti. Sebebi baıandamada hıdjab degen sóz aıtylmaǵanyn, betti tumshalaý dep nıkab pen paranjany meńzegenine sendirýge tyrysty.

– Betti jabý azamattyń túr-tulǵasyn anyqtaýǵa qıyndyq keltiredi. Bul eń birinshi kezekte bizge qaýipsizdikti qamtamasyz etedi.  Órkenıetti elderdiń barlyǵynda osy shekteý bar. Memleket eshqashan zaıyrlylyqtan, dinı senim bostandyǵynan taımaıdy. Óıtkeni bul Ata zańda jazylyp tur,– dedi mınıstr. 

Jańa zań úkimine alańdaǵan halyq mınıstrlikke resmı joldaý jasap, petısıa jazyp úlgergen. Bunyń bári de tıisti ýákiletti organdarda qaralmaq.

 – Mınıstrlikte qoǵamdyq, saraptamalyq keńester bar. Zańnamalyq ózgeristerdi talap etetin barlyq máseleler aldymen sarapshylar men qoǵam arasynda taldanady, sodan keıin ǵana naqty sharalar qolǵa alynady. Odan basqa, qoǵamdaǵy turaqtylyq pen qaýipsizdikti saqtaý úshin qajetti sharalardy qabyldaý – ýaqyt talaby. Bizdiń basty maqsatymyz el birligi men turaqty damý. El qaýipsizdigine memleket qana emes, árbir adam jaýapty ekenin túsinýi tıis. Bunyń ishinde aqparatty durys taratý máselesi de kiredi, – dedi Aıda Balaeva.

Eske sala keteıik, buǵan deıin Qazaqstanda hıdjab pen basqa da dinı kıimderdi qoǵamdyq oryndarda kıýge tyıym salynǵany aıtylǵan edi. Bul termındi shatastyryp aıtqan mınıstrdiń qateligi álde BAQ betinde onsyz da qoǵamda órship turǵan dinı máseleni qıyndatýǵa jasalǵan áreket boldy.

Qalaı bolǵanda da dástúrli baǵyttaǵy oramal taǵatyn qyzdarymyzǵa kesiri tıip ketpeýi kerek. Kópshilik eki taraptyń aıyrmashylyǵyn syrttaı uǵyna almaıdy. Zańdy júzege asyramyn dep «shash al dese, bas alatyndar» tabylyp qoǵamda tártip ornatýshylar da tabylmasyna kim kepil? Dinı jaǵdaı asqynǵan shet elderde qyz balalar kóshede erkin júre almaıtyn deńgeıge jetken.

Jalpy «hıdjab» degen sóz qazaqta joq, oramal bar. Birinshi kezekte osy termınniń ózin qoldanystan shyǵarýymyz kerek. «Men hıdjab kıemin» dep alyp, «Ústińdegi arabtyń kıimi» degenge nege renjıdi?! Namazdyń ataýyn da aqsham, quptan dep qazaqshaladyq, biraq narazylyq týdyryp júrgen osy sóz ben kıimniń maǵynasyn, talabyn uǵynbaı esh nátıjege jete almaımyz, sodan daýdyń ústinen daý týady.