Sońǵy tórt jarym jylda úıdegi zorlyq-zombylyqtan 869 adam kóz jumdy. Bul týraly mádenıet jáne aqparat mınıstri Aıda Balaeva málimdedi.
Mınıstr prezıdent otbasylyq-turmystyq zorlyq-zombylyqtyń kez kelgen túri, onyń ishinde kámeletke tolmaǵan balalarǵa jasalǵan qastandyq úshin jazany kúsheıtý máselesin únemi kóterip kele jatqanyn atap ótti.
"Búgingi statısıka kóńil kónshitpeıdi. Sońǵy tórt jarym jylda úıdegi zorlyq-zombylyqtan 869 adam kóz jumdy. Densaýlyqqa aýyr zıan keltirýdiń 2086 faktisi tirkelgen. Sondyqtan aldyn alý sharalaryn keshendi túrde júrgizý bizdiń jiti nazarymyzda", - dedi Balaeva úkimet otyrysynda.
Aıtýynsha, otbasylarǵa jan-jaqty kómek kórsetý úshin óńirlerde 68 otbasyn qoldaý ortalyǵy jumys isteıdi, onyń 19-y ýaqytsha baspanamen qamtamasyz etedi.
"Bul tájirıbe 2019 jyldan beri bar. Járdemge muqtaj azamattarǵa "bir tereze" qaǵıdaty boıynsha kómek kórsetilýde. Ortalyqtar psıhologıalyq, áleýmettik jáne quqyqtyq kómek kórsetýmen qatar otbasy ınstıtýtyn nyǵaıtýǵa jan-jaqty qoldaý jasaıdy", - dedi mınıstr.
Pikir qaldyrý