Túrkistan oblysynda balalarǵa zorlyq jasady degen kúdikke ilingen turǵyn ustaldy, dep habarlaıdy Túrkistan oblystyq polısıa departamentiniń baspasóz qyzmeti.
"Túrkistan oblysynyń polıseıleri 33 jastaǵy aýyl turǵyny tarapynan kámeletke tolmaǵan qyzdarǵa qatysty quqyqqa qaıshy áreketter jasaý faktisi boıynsha eki jergilikti turǵynnyń aryzyna sáıkes sotqa deıingi tergeýdi bastady", - deıdi Túrkistan oblysy polısıa departamentiniń bastyǵy Murat Qabdenov.
Jedel-izdestirý kezinde qylmys jasady degen kúdikpen Otyrar aýdanynyń turǵyny ustalyp, qamaýǵa alynǵan.
"Meniń tapsyrmam boıynsha arnaıy jedel-tergeý toby quryldy. Qylmystyq kodeksiniń 120-baby 4-bóligi "Zorlaý" boıynsha qylmystyq is qozǵaldy. Barlyq mán-jaıdy anyqtaý úshin qajetti is-sharalar júrgizilip jatyr. Er adam óz kinásin moıyndady. Tıisti saraptamalar jasalady", - deıdi oblystyq polısıa departamentiniń basshysy Murat Qabdenov.
Polısıa bastyǵy tergeý aıaqtalǵansha jalǵan aqparat taratyp, eldi dúrliktirýden aýlaq bolýdy surady.
"Mundaı jaıttar boıynsha mindetti túrde jiti baqylaý bolady, sondyqtan sabyr saqtap, zań aıasynda tergeý nátıjesin kútýlerińizdi suraımyn", - dep qosty ol.
Eske salsaq, buǵan deıin advokat Aıman Omarova óziniń áleýmettik jelidegi paraqshasynda Túrkistan oblysynyń turǵyny kámeletke tolmaǵan jeti qyzdy zorlaǵanyn aıtqan edi.
"Bizge Túrkistan oblysynyń turǵyndary "One-Stop-Service" jobasyna júgindi, ár túrli otbasylardan shyqqan keminde 7 qyz 1993 jyly týǵan er adam tarapynan jynystyq zorlyq-zombylyqqa ushyraǵan. Olardyń barlyǵy bir turǵyn úıde jáne bir podezde turǵan", - dep jazdy Aıman Omarova.
Pikir qaldyrý