Almatyda birneshe nomınasıalar boıynsha din salasynyń ózekti máseleleri týraly úzdik materıaldardy (maqalalar, qysqa beınerolıkter jáne t.b.) daıyndaý baıqaýynyń jeńimpazdary marapattaldy.

Baıqaýǵa 4 nomınasıa boıynsha 160-tan astam ótinim jumysy kelip tústi.

Saltanatty marapattaý rásimi 7 qarasha kúni saǵat 11:00-de «Holiday Inn Almaty» qonaq úıinde, «Aport Ballroom 1» zalynda ótti. Atalǵan is-sharany Almaty qalasy Din isteri jónindegi basqarmasynyń tapsyrysy boıynsha «JASTAR» damytý ortalyǵy»  jastar qoǵamdyq birlestigi uıymdastyrdy.

Baıqaýǵa Almaty qalasynda jumys jasaıtyn jergilikti jáne respýblıkalyq BAQ jýrnalıseri, stýdentter, táýelsiz pýblısıser men blogerler qatysty. Baıqaýǵa orys jáne qazaq tilderinde barlyǵy 160-tan astam ótinim jumysy kelip tústi. Usynylǵan jumystar dinı zańnama normalaryn túsindirý, konfesıaaralyq kelisim men toleranttylyq, ekstremıstik dinı aǵymdardyń áser etý qaýpi, dinı ekstremızm men terorızmniń aldyn alý jáne oǵan qarsy kúres sıaqty ózekti máselelerdi qamtıdy. Qazylar alqasy barlyq ótinimderdi qarap, jeńimpazdardy kelesi nomınasıalar boıynsha anyqtaldy:

• «Internet-resýrstaǵy qazaq tilindegi úzdik maqala» nomınasıasy boıynsha - Qanat Súleımenge 250 000 teńge aqshalaı syıaqy jáne sertıfıkat tabystaldy;
• «Internet-resýrstaǵy orys tilindegi úzdik maqala» nomınasıasy boıynsha - Dastan Eldeke 250 000 teńge aqshalaı syıaqy jáne sertıfıkat tabystaldy;
• «Internettegi jáne áleýmettik jelilerdegi eń jaqsy taqyryptyq qysqa beınerolık» nomınasıasy boıynsha - Oljas Aıtbanov, Asqat Baıtóre jáne Ersultan Rahımbekke jekeleı 120 000 teńge aqshalaı syıaqy jáne sertıfıkattar tabystaldy. (Qazylar alqasynyń sheshimimien atalǵan nomınasıa boıynsha qarastyrylǵan 350 000 teńge jalpy júlde qory eń úzdik dep tanylǵan 3 jeńimpazǵa teńdeı bólindi)
• «Eń belsendi bloger» nomınasıasy boıynsha - Elnar Berıkbaevqa 250 000 teńge aqshalaı syıaqy jáne sertıfıkat tabystaldy.

Sondaı-aq, basqa qatysýshylarǵa 50 myń teńgedegi somaǵa 5 aqshalaı yntalandyrý sertıfıkaty tabystalady.

Júldelerdi tabystaý úshin Din isteri jónindegi basqarmasy basshysynyń orynbasary Kósheke Erǵalı men qazylar alqasynyń ókili Qurmanalıeva Aınur shaqyryldy. Baıqaýdy uıymdastyrýshylar BAQ pen blogerlerdiń din salasyndaǵy aǵartýshylyq jumystarynyń mańyzdylyǵyn atap ótti. Olardyń pikirinshe, bul halyqtyń dinı saýattylyǵyn arttyrýǵa, sondaı-aq dinı ekstremızm men terorızmniń aldyn alýǵa jáne oǵan qarsy kúreske qosqan qomaqty úles bolyp tabylady. Baıqaýdy uıymdastyrýshy «JASTAR» damytý ortalyǵy»  jastar qoǵamdyq birlestigi qazylar alqasynyń múshelerine atqarǵan jumystary úshin jeke alǵystaryn bildirdi. Sondaı-aq, uıymdastyrýshylar tarapynan baıqaýǵa qatysýshylardyń barlyǵyna yntalandyrý syılyǵy retinde M.Áýezov teatrynda qoıylatyn «Qazaqtar» tarıhı dramasyna bıletter tabystaldy.