Qazaqstan Joǵary jetistikter sportyna  búdjetten 775 mıllıon dollar bólip otyr. Bul týraly búgin májilis otyrysynda depýtat Nartaı Aralbaıuly habarlady. 

"Mynaý ne masqara? Halyq kedeıshiliktiń quzyna qulap jatqanda sportqa 775 mıllıon dollar bólý saý adamnyń aqylyna sıa ma? Eń soraqysy, qısapsyz aqsha bólsek te, jetken jetistigimiz joq. Mysaly, 2021 jyly Tokıoda ótken Jazǵy olımpıada oıyndarynda Qazaqstan quramasy bar-joǵy 8 qola medal ıelenip, 92 memlekettiń ishinde 83-shi oryn aldy. Sonda álgi 775 mıllıon dollarǵa jetken jetistigimiz osy ma? Endi salystyryp aıtaıyn, Joǵary jetistikter sportyna 41 mıllıon dollar bólgen Nıderlandy Tokıodaǵy olımpıadada 10 altyn, 12 kúmis, 14 qola medal aldy. Al Joǵary jetistikter sportyna 46 mıllıon dollar bólgen Danıa Tokıoda 3 altyn, 4 kúmis, 4 qola medal aldy. Biz 775 mıllıon dollardy sportqa bólip 8 qolamen keldik", deıdi depýtat. 

Sondaı-aq depýtat mınıstrliktiń 180 sport túrine qyrýar qarjy bólip otyrǵanyna narazy. 

"Tek 50-ge jýyǵy ǵana jazǵy olımpıada oıyndarynyń tizimine engen. Qalǵan 100-den astam sport túrine mınıstrlik ne úshin búdjetten aqsha bólip otyr? Salystyryp aıtaıyn, Ulybrıtanıa Olımpıada baǵdarlamasyna kiretin tek 15 sport túrine búdjetten qarjy bóledi, Germanıa 18 sport  túrine qazynadan aqsha beredi, al kórshimiz Ózbekstan tek 17 sport túrine búdjettiń qarjysyn jumsaıdy. Bizdiki ne shashpalyq? Qazaqstan qazynadan aqsha beretin 180 sport túriniń ishinde Penchak sılat, Sporttyq balyq aýlaý, Bıatl, Trıatl, Petank, Tekbol, Ýnıfaıt, Cherlıdıng degender júr. Bul   ataýlardy buryn estigender bar ma ózi? Aıtpaqshy Qazaqstannyń búdjetinen qarjy bólinetin jáne bir sport túri bar, sport na pılone degen. İzdep qarańyzdar, mınıstrlik buǵan qalaı qarjy bólip otyr dep jaǵa ustaısyzdar", dep málimdedi Nartaı Aralbaıuly. 

Óz saýalynda depýtat mınıstrlik bekitken 180 sport túrin shuǵyl túrde qysqartýdy usyndy. 

"Memleket basymdyq beretin baǵyttarda olımpıadalyq, ulttyq, odan keıin, para jáne sýrdolımpıadalyq sporttar qalýy tıis. Olımpıadalyq sporttardyń barlyǵy birdeı   jemis berip jatqan joq. Sondyqtan saraptama jasap, júlde ákeletin túrlerine ǵana basymdyq berý kerek", dep usyndy ol.