Astananyń qylmystyq ister jónindegi soty tirkelmegen "Alǵa, Qazaqstan" bastamashyl tobynyń jetekshisi, belsendi Marat Jylanbaevqa úkim shyǵaryp, 7 jylǵa sottady. Oǵan "tyıym salynǵan uıymnyń qyzmetine qatysty" jáne "ekstremızmdi qarjylandyrdy" degen aıyp taǵyldy. 

Sot otyrysy jabyq túrde ótti. Prokýror tirkelmegen "Alǵa, Qazaqstan" bastamashyl tobynyń jetekshisi Marat Jylanbaevty 10 jylǵa sottaýdy suraǵan. 

– Zańsyz tergeýden bastalǵan is zańsyz úkimmen aıaqtaldy. Úkimdi sózsiz apelásıaǵa beremiz. Maǵan sottyń hatshysy 16:45-te habarlasyp, onlaın sot 16:55-te oqylatynyn aıtty. Súıtip Zoom-nyń siltemesin berdi. Saǵat 16:55-te kirgen kezde sot úkimdi aıaqtap jatyr eken. Tek 7 jyl degenin ǵana estı aldym. Qosymsha shekteýlerdi estigen joqpyn. Sot úkimin qolǵa alǵannan keıin belgili bolady, – dedi advokat Azattyq saıtyna bergen pikirinde. 

Marat Jylanbaevtyń soty 30 qazanda bastalǵan edi. Belsendiler bılik Marat Jylanbaevty saıası sebeppen qýdalanyp otyrǵanyn aıtady. Al tergeý organdary belsendini qýǵyndaǵy eks-bankır Muhtar Áblázov qurǵan «Qazaqstannyń demokratıalyq tańdaýy» (QDT) qozǵalysyna qatysy bar dep boljaıdy.