Almaty qalalyq Tótenshe jaǵdaılar departamentiniń málimetinshe, 30 qarasha kúni saǵat 05:33-te Ádı Sháripov kóshesindegi órt týraly habarlama tústi. Birinshi órt sóndirý bólimi shaqyrtý ornyna 7 mınýt ishinde keldi.

 "Kelgen boıda 1 qabaty jáne jertólesi jataqhanaǵa aınalǵan 3 qabatty turǵyn úıdiń janyp jatqany anyqtaldy. Aldyn ala aqparat boıynsha órttiń jalpy aýdany – 30 sharshy metr. Qabyldanǵan sharalarmen órt 06:22-de joıyldy", – delingen departament habarlamasynda.

 Aldyn ala aqparatqa sáıkes órtti barlaý jáne sóndirý barysynda 13 adamnyń denesi tabyldy. Qazir olardyń kim ekeni anyqtalyp jatyr. Olar kómirtegi totyǵynan ýlanyp qaıtys bolǵan.

Sondaı-aq, 2 adam qalalyq jedel shuǵyl kómek kórsetý aýrýhanasyna jetkizildi. Naýqastardyń birine kómirqyshqyl gazyna ýlaný dıagnozy qoıyldy.

 "Onyń jaǵdaıy ortasha aýyr, turaqty. Ekinshi naýqas barlyq tekserýden keıin ambýlatorlyq emdelýge jiberildi", – delingen vedomstvo habarlamasynda.