Elimizdegi shekaradaǵy kólikterdiń keptelisi týraly másele májiliste kóterildi. Bul týraly depýtat Maqsat Tolyqbaı aıtty. 

"Shekara pýnkterin ótkizý qabiletin arttyrý sharalar qabyldap jatyrmyz, damytyp jatyrmyz deımiz. Biraq  Qyrǵyzstanmen shkaraǵa bara qalsań únemi uzyn-sonar kezek, júk kólikteriniń keptelisi bálenbaı shaqyrymǵa sozylyp jatady. Qazan aıynda aqparat quraldary 600-ge jýyq kóliktiń aptalap kezekte turǵanyn jazdy. Keıbir taýarlardyń merzimi ótip ketip jatty. Bul tek Qyrǵyzstanmen shekaradaǵy jaǵdaı emes. Reseı shekarasyna barsań da únemi osyndaı aıǵaı-shý bolyp jatady. Jalpy osy problemany qalaı sheshemiz? Osyǵan bas aýyrtyp jatqan adam bar ma?", dedi Maqsat Tolyqbaı. 

Maqsat Tolyqbaıdyń bul saýalyna qarjy mınıstri jaýap berdi. Ol shekara beketterindegi keptelis pen kezekti boldyrmaý úshin kerekti sharalar qoldanylyp jatyrǵanyn, bul jumystardyń 2025 jyly aıaqtalatynyn aıtqan bolatyn. 

"Bas aýyrtyp jatqan memlekettik organdar bar. Negizgi degen 10 syrtqy beketter boıynsha tolyq modernızasıa júrgizilip jatyr.  Reseı jáne Qyrǵyzstan elderimen shekara beketterinde kólik keptelisi bolyp jatatyny ras. Alaıda bul kólik mınıstrligine qarasty bolǵandyqtan olardyń óz josparlary bar. Qazirdiń ózinde keptelis bolmaýy úshin kerek jumystardy júrgizip jatyrmyz. Tasymaldaýshylardyń aldyn ala kezekke turýyna da múmkindik jasalǵan. Al siz aıtyp otyrǵan 600 kóliktiń kepteliste turýyna keletin bolsaq, arnaıy operasıa kezinde, kontrabandalyq taýarlardy ótkizý barysynda keptelis oryn alyp turatynyn moıyndaımyz", dedi qarjy mınıstri Erulan Jamaýbaev.