Senattyń jalpy otyrysynda «Qazaqstannyń keıbir zańnamalyq aktilerine «Azamattarǵa arnalǵan úkimet» memlekettik korporasıasy, «Astana Hab» halyqaralyq tehnologıalyq parki jáne daktıloskopıalyq tirkeý máseleleri boıynsha ózgerister men tolyqtyrýlar engizý týraly» zań ekinshi oqylymda maquldandy.

"Zańmen engizilgen mańyzdy jańashyldyqtyń biri daktıloskopıalyq tirkeý týraly erejeler bolyp sanalady. Mysaly, «Daktıloskopıalyq jáne genomdyq tirkeý týraly» 2016 jylǵy 30 jeltoqsandaǵy zańnyń 2-taraýynda Qazaqstan azamatynyń pasportyn nemese jeke kýáligin alý úshin alǵash ret júgingen, sondaı-aq buryn daktıloskopıalyq tirkeýden ótpegen Qazaqstan azamattary ony qalpyna keltirgen, aýystyrǵan jaǵdaılarda Qazaqstan azamattaryn mindetti daktıloskopıalyq tirkeý týraly normalar belgilengen bolatyn.«Daktıloskopıalyq jáne genomdyq tirkeý týraly» zańnyń 39-babymen 2-taraýdyń qoldanysy 2024 jylǵy 1 qańtarǵa deıin toqtatylǵan", - dep jazylǵan zańnyń qorytyndysynda.

Zańǵa sáıkes, endi qazaqstandyqtar saýsaq izin tapsyrýǵa mindettelmeıdi.

"Zańda Qazaqstan azamattaryna qatysty joǵaryda kórsetilgen erejeler alynyp tastalady jáne Qazaqstan azamattary úshin olardyń kelisimimen ǵana erikti daktıloskopıalyq tirkeý engiziledi. Qazaqstan azamaty úshin mindetti daktıloskopıalyq tirkeý teńizshiniń jeke kýáligin alǵan jaǵdaıda ǵana saqtalady. «Daktıloskopıalyq jáne genomdyq tirkeý týraly» zańda belgilengen jaǵdaılarda 16 jasqa tolǵan sheteldikter men azamattyǵy joq adamdar úshin mindetti daktıloskopıalyq tirkeý engiziledi. Zańǵa sáıkes daktıloskopıalyq tirkeýge qatysty erejeler 2024 jylǵy 1 qańtardan bastap qoldanysqa engiziledi.

Sheteldikter men azamattyǵy joq adamdar úshin jeke sáıkestendirý nómirin alýǵa Qazaqstan aýmaǵyndaǵy tirkeýshi organdarǵa jeke óziniń júginý talaby engiziledi. Buryn olar muny basqa adamdarǵa berilgen senimhat negizinde naqty ornalasqan jeri boıynsha jasaı alatyn", - dep jazylǵan zańnyń qorytyndysynda. 

Daýys berý nátıjesinde Senat depýtattary zańdy ekinshi oqylymda maquldady.