Osydan 2 jyl buryn Til saıasaty komıtetiniń qoldaýymen Qazaq tiliniń aıasyn keńeıtýge qatysty zań qabyldanǵan edi.

Til mártebesine baǵyttalǵan zań qazaq tiliniń mereıin ósirip, kez-kelgen ortada qazaq tilinde qyzmet etýdi talap qyla alatyndaı jaǵdaıǵa jettik dep qýanyp edik.

Endi keshe Ónerkásip jáne qurylys mınıstrligi "Memlekettik organdardyń ataýy jazylǵan mańdaıshalardy daıyndaý jáne olardy ákimshilik ǵımarattarda ornalastyrý qaǵıdalaryn bekitý týraly №114 buıryqty" qabyldapty. Oǵan vıse-mınıstr Iran Sharhan qol qoıǵan.

Iaǵnı, Sharlapaev kelip, "Mańdaıshalar tek qazaq tilinde ǵana emes, mindetti túrde orys tilinde qatar jazylý kerek". Sondaı-aq mańdaıshaǵa mekeme ataýyn tek qana memlekettik tilde jazýǵa, latyn árpin qoldanýǵa tyıym salynypty.

Bul endi elimizdegi barlyq memlekettik mekeme orys tilin qoldanýy mindet degen sóz. Qazaqtyń elinde qazaqtyń buıryǵymen qor bolǵan qazaqtyń tili.

– Osydan eki jyl buryn jeltoqsan aıynda Til týraly arnaıy zań qabyldandy. Búkil jarnama, el, jer, eldimeken, jer-sý ataýlary, asqana, toıhanalardyń as mázirleri mindetti túrde qazaq tilinde jazylýy kerek dep Parlamentte talqylanyp, qabyldanǵan. Ol zań biraq "ıt úredi, kerýen kóshedi" kúıi qaldy. Eskerýsiz qaldy, eshkim elemek túgili, ol zańnyń baryn da bilmeıdi. Ónerkásip mınıstrliginiń bul buıryǵy da jaıyna qalsa eken. Óıtkeni negizgi zań oryndalmaı otyr. Bizdegi barlyq mekemelerde is-qaǵazdardyń bári onsyz da orys tilinde jazylyp júr ǵoı.

Men orys tiliniń mindetti bolýyna qarsymyn. Qazaqstanda tek qana qazaq tili dara júrýi kerek. Eger zańda qazaq tilinde jazylýy kerek dep, al is júzinde qazaq tili qoldanylmasa, onda orys tilin alyp tastaıtyn kez keldi. 34 jylda úırenbegen tilimizdi bular endi úırenbeıdi de. Bıliktegilerge kezinde qazaq tilin úırenýge ýaqyt ta berilgen. Biraq úırengen eshkimdi kórmedim. Sondyqtan da habarlandyrý da, mańdaıshadaǵy taqtaısha da tek qazaq tilinde ǵana jazylýy kerek, – deıdi til janashyry Beıbit Ospan.