Almatyda jeti jastaǵy Karınany asqan qatygezdikpen uryp óltirdi dep aıyptalǵan áıel bar kináni qyzdyń ákesine artyp otyr. Búgingi sotta aıyptalýshy ógeı qyzy týǵan ákesiniń qolynan qaza tapqanyn aıtty, - dep habarlaıdy KTK telearnasy.

Atyshýly iske qatysty kezekti sot otyrysynda kúdikti áıel azamattyq nekedegi kúıeýin jamandaýmen boldy. Ákesi qyzyna únemi qol jumsaǵanyn, jalpy ishkilikke qumar bolǵan deıdi. Karınany ákesi kezekti ret ońbaı sabap, aqyry jetkinshek tilge kelmesten kóz jumdy deıdi.

"Karına dáretin jiberip qoıyp, ákesi ony jýyndyrýy kerek bolǵan. Men oǵan "tek urma" dedim. Úı jınap júrip vanadan bir dybys shyqty. Baryp qarasam, Karına vananyń ishinde isinip, qoryldap jatyr. Jýyndyryp bólmege aparyp jatqyzdym. Men tek ony talyp qalǵan eken dep oıladym. Ólip qalady degen oı bolmapty", - deıdi aıyptalýshy.

Aıyptalýshy "kúıeýiniń qylmysyn jasyrmaı, áý basta shyndyqty aıtý kerek edi" dedi.

Eske salaıyq, oqıǵa byltyr shildede boldy. Jeti jastaǵy qyz ógeı sheshesinen tórt aı boıy taıaq jep, aqyr sońynda mıyna qan quıylyp kóz jumǵan. Qyzdyń ógeı sheshesi ári ózin qoǵam belsendisi retinde kórsetetin Baljan Turlybekova qamaýǵa alynǵan edi. Qaıtys bolǵan Karınanyń ájesi men ózge de týystary qyzdyń týǵan ákesin de jaýapqa tartýdy talap etken.