Qazaqstannyń medısınalyq mekemelerinde maska rejımi qaıta oraldy. Azamattarǵa halyq kóp jınalatyn oryndarda da betperde kıý usynyldy. Tıisti qaýlyǵa eldiń bas memlekettik sanıtarıalyq dárigeri qol qoıdy.
Qaýly halyq arasynda aýa-tamshy joly arqyly beriletin ınfeksıalyq aýrýlardyń (qyzylsha, COVID-19, tumaý jáne basqa da jiti respıratorlyq vırýstyq ınfeksıalar) taralýynyń aldyn alý maqsatynda qabyldanǵan.
Barlyq óńirge medısınalyq uıymdarda personal men kelýshilerdiń medısınalyq betperde taǵýyn jáne antıseptıkterdiń bolýyn qamtamasyz etý tapsyryldy.
Sondaı-aq halyq arasynda koronavırýs, tumaý men JRVI profılaktıka sharalary týraly aqparattyq-túsindirý jumystary júrgiziledi.
Buǵan qosa densaýlyq saqtaý mınıstrligi qazaqstandyqtarǵa halyq kóp jınalatyn oryndarda (áýejaı, temirjol vokzaly, avtovokzal, bazar, saýda-oıyn-saýyq ortalyǵy, saýda úıi, teatr, kınoteatr, HQKO, bankter jáne t.b.), sonymen qatar kóliktiń barlyq túrinde (qoǵamdyq kólik, áýe, temir jol kóligi) medısınalyq nemese matadan tigilgen maskalardy paıdalanýǵa keńes berdi.
Osy qaýly qol qoıylǵan kúnnen bastap kúshine enedi.
Pikir qaldyrý