Ekologıa jáne tabıǵı resýrstar mınıstri Erlan Nysanbaev 10 aqpannan bastap Qazaqstanda aqbókenderdi atý toqtatylǵanyn málimdedi.

"Kıikterdi atý qazir toqtatyldy. Otandyq ǵalymdarmen jáne halyqaralyq sarapshylarmen keńesip, pikirtalas júrgizgennen keıin kıik atý toqtatyldy. Sonymen qatar, qazir qys kezinde dalada júrý qıyndady. Byltyrǵy jyldy eskere otyryp, bıyl mamyr aıynda egjeı-tegjeıli esep júrgiziledi. Sondyqtan 10 aqpannan bastap kıikterdiń sanyn retteý prosesin toqtattyq. Aldyn ala esepteý boıynsha shamamen 40 paıyz ósim boldy. Jalpy, byltyrǵy ósimdi esepke alǵanda tóldeıtin ýaqytta shamamen 2,5-2,6 mıllıon bas bolady. Tipti pesımısik jaǵdaıda da bıyl ósim baıqalady", - dedi mınıstr májilis kýlýarynda.

Eske sala ketsek, mamandar 2023 jyldyń kúzde eldegi aqbóken sany 2,6 mıllıonǵa jetedi dep boljaǵan. Bulaısha popýlásıanyń ósýi óńirlerdegi sharýalardy shyǵynǵa ushyratyp, jaıylymdyq jerlerdiń tapshylyǵyn týdyrýy múmkin ekeni de aıtyldy. Sany 1,9 mln-ǵa jetken kıik Qostanaı, Qaraǵandy, Aqmola, Aqtóbe, BQO-da egis alqaptaryn taptaǵan. Shamamen 122 myń ga egis alqaptaryna 12 mlrd teńgege shyǵyn kelgen. Sol sebepti Úkimet kıik sanyn qoldan azaıtýdy «qaral» tásili boıynsha júrgize almaǵandyqtan, atýǵa ruqsat berdi.