Almaty qalasy ákiminiń eks-orynbasary Arman Orazbaıuly Qyryqbaev Prezıdent ákimshiligi Komýnıkasıalar bóliminiń meńgerýshisi laýazymyna taǵaıyndaldy. Bul týraly Aqorda saıty habarlady.

Arman Qyryqbaev 1976 jyly 20 qazanda Selınograd qalasynda dúnıege kelgen. Qazaq memlekettik basqarý akademıasynyń, sondaı-aq Qazaqstan Respýblıkasy Syrtqy ister mınıstrliginiń Dıplomatıalyq akademıasynyń túlegi. Mamandyǵy boıynsha halyqaralyq ekonomıs.

Memlekettik qyzmette, mádenıet jáne jastar saıasaty salasynda 25 jyldan astam eńbek ótili bar.

Eńbek jolyn 1996 jyly Qazaqstan Respýblıkasy Syrtqy ister mınıstrliginiń referenti, attashesi bolyp bastaǵan.

Ár jyldary Qazaqstan Respýblıkasy Syrtqy ister mınıstrliginiń úshinshi, ekinshi hatshysy, «ABE korporasıasy» men «K-MART» JSHS-nyń Bas dırektory, Almaty qalasy Medeý aýdany ákiminiń orynbasary, Almaty qalasy jastar saıasatyn damytý memlekettik qorynyń dırektory, Mádenıet jáne aqparat mınıstrligi Qoǵamdyq-saıası jumys jáne jurtshylyqpen baılanys departamentiniń dırektory, Mádenıet komıtetiniń tóraǵasy, Qaraǵandy oblysy ákiminiń orynbasary qyzmetterin atqardy.

Mádenıet jáne aqparat vıse-mınıstri laýazymynda, Nur Otan partıasy tóraǵasy birinshi orynbasarynyń keńesshisi, Almaty qalasy ákiminiń orynbasary, Nur Otan partıasynyń hatshysy sekildi qyzmetterde bolǵan.

Sońǵy atqarǵan qyzmeti – Almaty qalasynyń ákimi Erbolat Dosaevtyń orynbasary.