Almaty oblysy Talǵar aýdanynyń polısıa qyzmetkerleri Almatyda "saıası tutqyndardy" qoldap, baspasóz máslıhatyn ótkizbek bolǵan saıasatker, qoǵam belsendisi Rysbek Sársenbaıdy ustap áketken. Bul týraly Azattyq radıosy habarlady.
Basylym málimetinshe, polısıa bólimine aparylǵan belsendiniń qan qysymy kóterilip, qazirgi ýaqytta Talǵar aýdany aýrýhanasynyń jansaqtaý bólimine jetkizilgen.
Azattyq radıosy belsendiniń kelinshegi, quqyqqorǵaýshy Marjan Aspandıarovanyń "ustaý kezinde polısıa kúsh qoldandy" degen sózin keltirdi. Onyń aıtýynsha, polısıa ózderin tanystyrmaı, qujattaryn alystan ǵana kórsetip, ne úshin alyp ketýge kelgenin túsindirmeı, súırelep, dóreki kúsh qoldanǵan. Osydan keıin Rysbek Sársenbaıdyń qan qysymy kóterilip ketken.
Advokat Jalǵas Saparhanovanyń aıtýynsha, polısıa Rysbek Sársenbaıuly men Marjan Aspandıarovany ustaý kezinde dóreki kúsh qoldanǵanyn moıyndamaǵan. Polısıa Qonaevtaǵy jýrnalıs Dýman Muhammedkárimniń sotyna baılanysty is qozǵalǵandyǵyn aıtqan.
Tolyqtyrý: Arada birneshe saǵat ótkennen keıin Rysbek Sársenbaıuly bosap shyqty.
Óziniń sózinshe, ony ustaýdaǵy sebep - baspasóz jıynyn ótkizdirtpeý.
Pikir qaldyrý